الحلقة الأولي - هاتتباع ...!!!
من أهم المميزات لما تكوني في ثانوية مشتركة انك هاتدخلي عالم الرجالة بدري بدري وتتودكي بدري بدري وتبقي خبرة مش أي كلام في التعامل مع الصنف الخشن وتعرفي مقالب الولاد ( مشاريع الرجالة ) – وأشتغلاتهم وتتفرجي علي قصص الحب والمقالب والنميمة اللي من نوعية بيبو فرقع جيجي بأختصار الثانوية المشتركة عالم متنوع – مختلف – متجدد.
الحدث كان حدث جلل عيد ميلاد أحمد رمضان وعلشان تبقوا معايا في الصورة أحمد رمضان البوي فريند بتاع نسرين هما الأتنين من أشهر كابلز المدرسة والحدث ده مشهود وبناء عليه كنا عاقدين أجتماع علي مستوي الدكة وبحضوري انا ( سلمي ) وبصفتي من أهم المخططين للأحداث الجلل في المدرسة :)
ومصطفي خروف – وخروف دي مش شتيمة ولا لقب في البطاقة ده أسم الشهرة – وكما تقضي العاده في ثانويتنا المبجلة لازم يكونلك أسم شهرة، وبرضة علشان محدش مخة يروح لبعيد خروف دي مش بسبب خلل في سلوكة ولا حاجة الواد كان زي الفل. بس ده مش موضوعنا
وكان حاضرنا كمان محمد دمرداش رائد الفصل والكبير بتاعنا ولازم ناخد شورته طبعا حتي لو كان لا هايقدم ولا هايأخر
وأحمد صلاح وأحمد من الشخصيات القليلة اللي مكنش ليها اي دور فعال ولا شعبية ولاأسم شهرة ولا حاجات كتير يعني من الآخر شخصية موجودة ومش موجودة بس اهو عامل للقاعدة قيمة
ومن البنات بقي غدود ( غادة ) صديقتي اللدودة ، روني ( رانيا ) أنتيمة نسرين ، راندا ( مفيش داعي لذكر أسم شهرتها ;)
وتمت مناقشة جدول الأعمال وحدننا المكان ( الفصل بتاعنا ) والزمن ( الفسحة ) وطبعا المنيو واللي اقترحنا في الأول يكون تورتة بس قولنا خسارة فيهم وممكن يقتلوا بعض علشانها ،طب جاتوه وكل واحد ياخد حتة منفعش الخبر هاينتشر انتشار النار في الهشيم والمدرسة كلها هاتيجي ، اخيرا وصلنا لحل عبقري وهو اننا نجيب كيكة بالشكولاتة اللي بتتباع في السوق وكل واحد ياخد واحدة علشان يغني هابي بيرث زي تويو وكدة ونبقي عاملنا الحفلة وخزينا العين وأحمد ونسرين يحتفلوا لوحديهم في اي كوفي شوب ( عين العقل والله )
وبقيت أهم نقطة علي جدول الأعمال وهي الهدية !!! ابتدت البنات تقترح
أنا : برفان أوريجينال
مصطفي : هايتباع
غادة : سبحة فضة
مصطفي : هاتتباع
رانيا : كرافت ومنديل براند نيم
مصطفي : هايتباع
عند النقطة دي كلنا وصلنا لحالة من الوجوم والصمت أحنا البنات بنحاول نستوعب والولاد مش مصدقين ان مصطفي بيقول اللي بيقوله ده
وقبل ما حد يفكر في حاجة فسر مصطفي وقال ان أي هدية غالية بتيجي للولاد بيبعيوها علشان يستفيدوا بتمنها خصوصا لو مش اساسية قوي وقالنا افتكروا كدة الهدايا بتاعتكم عمركم شوفتوا ولد استعمل منها حاجة
...................... صمت رهيب من الناحيتن
البنات كنا بنفتكر جبنا ايه ولمين واتعمل فيه ايه ؟؟؟
رانيا مثلا فكرت الساعه اللي جابتها لعصام القزعه ملبسهاش ولا مرة ليه ؟؟؟ طب مثلا الولاعة اللي جابتها طمطم للواد عزت قدامنا ولا مرة شوفناها معاه كمان السلسة الدهب اللي جابتها رشا لمحسن راحت فين ؟!!! طب بلالالالاش كل دول بلاش أنا لما جبت لخالد السنة اللي فاتت الأعمال الكاملة لشكسبير ولامرة شوفتة بيقراها ولا قالي انه فاتحها اصلا – عاااااااااااااااااا
الولاد عاوزين يقوموا يضربوا مصطفي لأنه كشف عن السر الخطير ده بس كان فات الآوان والخبر انتشر وقامت الحرايق في كل حتة بين كل الكابلز وكل واحدة بتحقق في الموضوع رانيا ماسكة عصام القزعه من رقبتة واتضح ان المزاد اللي كان معمول من اسبوعين في الحوش الوراني كان علي الساعة اللي جابتهالو ، الولاعة بتاعه طمطم اللي كنا شاكين انها نفس ولاعه أستاذ أنيس بتاع الجغرافية طلعت هي ، رشا زنقت الواد محسن وضغطت عليه ضغط الشبشب للصرصار فأعترف انه باعها علشان يدفع مجموعة التقوية ومستخسره فيه يعني حتة سلسلة دهب وهو يتيم الأم وابوه طفشان وهو عمل كده علشان ايه مش علشان ينجح ويتفوق ويبقي جدير بيها – وبفلوس ابوها - انا بقي خالد حلفلي براس امه انه متصرفش في المجموعة وملقحة عندهم في البيت مع التنبيه عليا اني لما اجيبلة هدية افكر في حاجة تصلح للألفيه الجديدة !!!! وناس تهدي النفوس وناس تطفي الحرايق وكان لازم مصطفي يدفع التمن غالي ( غير انه انضرب لأن ده مكنش كفاية وكان عادي بالنسبه له)
وطبعا اتردتلة في هداية عيد ميلادة اللي كانت عبارة عن ( علبة سمنة روابي – بافيتة – تتينة – قصافة - .... وأشياء أخري من هذا القبيل ) وتخيلوا بقي شكلة وهو بيفتح الهدايا اللي كانت ملفوفة أخر شياكة ( الهدايا دي كانت فكرتي ) نياهااهاهاهاهاها
ومن يومها وانا بتبع نفس النهج فيما يخص الهدايا الولادي اهو منها أضمن انها مش هاتتباع ومن ناحية تانية نهزر ونضحك ومن ناحية تالتة نوفر الفلوس لحاجة تنفع ويبقي عملنا الواجب
لحد مكان في عيد ميلاد حد عزيز عليا قوي وقولت لالالالالالالا يابت خلاص كبرنا بقي واللي بيهادي بيهادي قيمتة وعلي قد معزة الشخص اللي قدامة وبعد فحص وتمحيص ولف ودوران وطلوع ونزول ومشاورة الزملا من الرجالة جبت الهدية اللي أستقبلها هو بمنتهي الشياكة والسعاده وبعد ماروحت اتصل بيا يشكرني جداً وبيعتذرلي انه مش هايقدر يستعملها لأن معندهوش مفاتيح يحطها فيها !!!!!!!
