حاجات تغيظ

أيها الملاحدة العرب ، عفواً لا أفهمكم

2011-04-17T08:00:00.000-07:00

تقودني الصدفة من حين إلي آخر إلي موقع أو مدونة أو صفحة علي الفيس بوك تخص أحد الملحدين والأمر المشترك بينهم جميعاً هو سب وإحتقار الأديان الأخري فالمواضيع كلها تنصب في مهاجمة الأديان السماوية !!! والأمر الذي لا أفهمة حقاً لماذا لا تسب الديانة البوذيه أو مذهب كونفوشيوس مثلاً !!!

ليست قضيتي مع الإلحاد في حد ذاتة فالقاعدة هي " من شاء فليؤمن ومن شاء فليكفر" لكن ما لا أفهمة هو إقتصار الملاحدة العرب علي سب الأديان !!!

والتعامل بصلف وغرور متناهي وكأنهم ملكوا الحقيقة ، نعم من حقك أن تنكر وجود الله ولكن ليس من حقك أن تسب ديني وعقيدتي وقناعاتي الأمر الغريب أن قليلاً بل نادراً ما يخرج علينا ملحد غربي لسب ديننا أو يهاجمة وفرق كبير هنا بين السب ونقد الدين وتفنيد فكرة وجود إله من عدمها.

والنادر أيضاً أن تجد من بين الملاحدة العرب من قاد رحلة طويلة من الشك مروراً بكل الأديان الوضعية والسماوية حتي أنتهي إلي فكرة إنكار وجود الخالق بل أنتقلوا من الدين إلي اللادين هكذا !!!

أغلب ظني أنها الطريق الأيسر والأسهل فإذا لم تتوافق مع أمر أو أمور من دينك فتنتقل إلي إنكار كل الأديان بدلاً من البحث عن دين أخر .. ففكرة الإلحاد هي فكرة مقبولة في مجتمعاتنا والأمر غير مكلف فيكفي ان تلحد بينك وبين نفسك وأن تبحث عن زمرة من الأصدقاء الملحدين وأن تكف عن ممارسة أي طقوس عقائدية فيدعوا لك من حولك بالهداية.

وتنشئ مدونة أو صفحة أو موقع تمارس فيها هوايتك في سب الأديان الأخري ....

أما التحول من دين لأخر فهو شئ تقوم عليه الدنيا ولا تقعد في مجتمعاتنا والأمر ليس بجديد فكلاً من سيدنا أبو بكر , وسيدنا علي رضي الله عنهما وأرضاهما لم يسجدا لصنم قط ولم يكن الأمر ذي بال بل مُرست عليهما ضغوط لأداء العبادات ، أما حينما أعلنا أسلامهما قامت قريش وهاجت وماجت.

وهو ما يضع المتحول دينياً تحت طائلة الأعراف والتقاليد والغضب المجتمعي الذي قد يصل إلي إهدار دمة وتعريض حياتة للخطر.

لهذا نجد أن الملاحدة الغربيين هم من صفوة المجتمع ككتاب أو علماء أو مفكرين أختاروا الإلحاد عن قناعة وبعد رحلة بحث في الأديان وقراءات متعمقة – وانا هنا لا أثني علي فكرة الإلحاد لكنه توضيح للفارق فقط -

فالرجل منهم قد قرأ وسمع وناقش وربما تحول من دين لآخر في مرحلة ما , فهو ليس بحاجة لإنكار وجود إله ليتخلص من أداء العبادات والإلتزام الأخلاقي الذي يفرضة الدين ، فهو ان لم يكن ذا دين فهو ذا أخلاق راقية كإنسان متحضر.

وقد كان لي لقاء منذ عاميين مع رجل إنجليزي جمعتني به علاقة عمل وكان خلوقاً جداً Gentleman بكل ما تحمل الكلمة من معني وفي البداية أثني علي حجابنا وأنه أنيق جداً ويظهر تفاصيل الوجه وبعد عدة أيام سألني عن سبب أرتداءنا له فأجبتة بأنه أحدي الفروض الدينية , فعلق ببساطة انه لا يؤمن بوجود إله لذا فهو يري انه من غير العادل إلزامنا بالحجاب لكنة يحترم ذلك طالما هو إختيارنا.

وعندما شرع يشرح لي أسباب إنكارة لوجود إله طلب مني زميل لي بالعربية بإنهاء المناقشة في أمور الدين لأننا لسنا أهلا لها. فما كان مني الا أن أخبرتة أني سأحترم فكرة إلحادة طالما هو يحترم فكرة تديني.

نعم كان هذا هو كل شئ مع شخص ملحد... لا سباب ولا تبادل إتهامات ولا صوت عالي ولا شئ ...

وهم حين يهاجمون ديناً فهم يقدمون الدليل بالدليل والحجة بالحجة والمناظرات بين الدينين واللا دنيين معروفة ومنتشرة وتتم تحت مرئي ومسمع من الجميع.

أما ملحدونا في العالم العربي بلا فكر ولا عقل لا شئ سوي السباب والسباب والسباب !!! وإذا دعوت أحدهم لمناظرة أو مناقشة جادة تهرب منك وتظاهر بعدم إستلام رسالتك ؟؟

أنا كثيراً اتسائل أي فكر تحملون ولأي رأي توجهون ؟؟؟ ولماذا تتحلون بقدرات هائلة علي إستخدام أقذع التعبيرات واسوأ الشتائم وهو إن لم يستفز مشاعر الغضب لإهانة الدين فسيستفز مشاعر الإستياء والتقزز منكم !!!

أم أن فكرة إخفاء هويتكم الحقيقة والتحدث من وراء الشاشات ومن خلف الكي بوردات هي من تخلق تلك الجرأة التي تصل لحد العته أحياناً كثيرة.

الأمر الثاني الذي عجزت عن تبريرة وفهمة أيضاً هو ردود أفعال الدينيون – أيا كان دينهم – علي هذا الهجوم واكثريتهم مسلمون فهو الدين الذي يأخذ النصيب الأكبر من هجوم الملحدين فمجرد أن يكتشف أحدهم وجود مدونة أو صفحة أو موقع حتي يسعي لتعريف الجميع بها وفي ساعات تجد الألاف قد أنضموا للصفحة أو زارو المدونة وتبادلوا السباب وإطلاق اللعنات والدعوة علي صاحب الصفحة أو الموقع !!!!!

أولاً لماذا يتهافت الجميع علي مهاجمة مثل هؤلاء الأشخاص ويري الكثيرين منهم انهم حماة الدين والمدافعين عنه والمجاهدين في سبيل الله. فأنا وأنت ومن علي شاكلتنا لسنا دعاة أو فقهاء أو ممن تشرفوا بحمل لواء هذا الدين. نحن إذن لسنا متخصصون للرد علي أمثالهم.

فهلا تجاهلتم أمثال هؤلاء أو طالبتم الجهات المتخصصة بالرد عليهم أو أستجلبتم أحد العلماء أو الفقهاء ليحاربوا الفكر بالفكر وليس السباب بالسباب ووفرتم الوقت والجهد وإشتهارهم وإنتشارهم بيننا.

الأمر الثاني هو أن محاولات غلق صفحاتهم أو مدوناتهم أو مواقعهم تجعلهم يستعينون بمن هو منهم وتصبح الصفحة صفحات والمدونة مدونات والموقع مواقع وهكذا .... ندخل في دائرة لا تنتهي أليس الأولي أن نلتفت لما هو أهم وأنفع.

من أوراق سلمي - ثانوية مشتركة

2010-10-18T02:51:00.000-07:00

الحلقة الأولي - هاتتباع ...!!!

من أهم المميزات لما تكوني في ثانوية مشتركة انك هاتدخلي عالم الرجالة بدري بدري وتتودكي بدري بدري وتبقي خبرة مش أي كلام في التعامل مع الصنف الخشن وتعرفي مقالب الولاد ( مشاريع الرجالة ) – وأشتغلاتهم وتتفرجي علي قصص الحب والمقالب والنميمة اللي من نوعية بيبو فرقع جيجي بأختصار الثانوية المشتركة عالم متنوع – مختلف – متجدد.

الحدث كان حدث جلل عيد ميلاد أحمد رمضان وعلشان تبقوا معايا في الصورة أحمد رمضان البوي فريند بتاع نسرين هما الأتنين من أشهر كابلز المدرسة والحدث ده مشهود وبناء عليه كنا عاقدين أجتماع علي مستوي الدكة وبحضوري انا ( سلمي ) وبصفتي من أهم المخططين للأحداث الجلل في المدرسة :)

ومصطفي خروف – وخروف دي مش شتيمة ولا لقب في البطاقة ده أسم الشهرة – وكما تقضي العاده في ثانويتنا المبجلة لازم يكونلك أسم شهرة، وبرضة علشان محدش مخة يروح لبعيد خروف دي مش بسبب خلل في سلوكة ولا حاجة الواد كان زي الفل. بس ده مش موضوعنا

وكان حاضرنا كمان محمد دمرداش رائد الفصل والكبير بتاعنا ولازم ناخد شورته طبعا حتي لو كان لا هايقدم ولا هايأخر

وأحمد صلاح وأحمد من الشخصيات القليلة اللي مكنش ليها اي دور فعال ولا شعبية ولاأسم شهرة ولا حاجات كتير يعني من الآخر شخصية موجودة ومش موجودة بس اهو عامل للقاعدة قيمة

ومن البنات بقي غدود ( غادة ) صديقتي اللدودة ، روني ( رانيا ) أنتيمة نسرين ، راندا ( مفيش داعي لذكر أسم شهرتها ;)

وتمت مناقشة جدول الأعمال وحدننا المكان ( الفصل بتاعنا ) والزمن ( الفسحة ) وطبعا المنيو واللي اقترحنا في الأول يكون تورتة بس قولنا خسارة فيهم وممكن يقتلوا بعض علشانها ،طب جاتوه وكل واحد ياخد حتة منفعش الخبر هاينتشر انتشار النار في الهشيم والمدرسة كلها هاتيجي ، اخيرا وصلنا لحل عبقري وهو اننا نجيب كيكة بالشكولاتة اللي بتتباع في السوق وكل واحد ياخد واحدة علشان يغني هابي بيرث زي تويو وكدة ونبقي عاملنا الحفلة وخزينا العين وأحمد ونسرين يحتفلوا لوحديهم في اي كوفي شوب ( عين العقل والله )

وبقيت أهم نقطة علي جدول الأعمال وهي الهدية !!! ابتدت البنات تقترح

أنا : برفان أوريجينال

مصطفي : هايتباع

غادة : سبحة فضة

مصطفي : هاتتباع

رانيا : كرافت ومنديل براند نيم

مصطفي : هايتباع

عند النقطة دي كلنا وصلنا لحالة من الوجوم والصمت أحنا البنات بنحاول نستوعب والولاد مش مصدقين ان مصطفي بيقول اللي بيقوله ده

وقبل ما حد يفكر في حاجة فسر مصطفي وقال ان أي هدية غالية بتيجي للولاد بيبعيوها علشان يستفيدوا بتمنها خصوصا لو مش اساسية قوي وقالنا افتكروا كدة الهدايا بتاعتكم عمركم شوفتوا ولد استعمل منها حاجة

...................... صمت رهيب من الناحيتن

البنات كنا بنفتكر جبنا ايه ولمين واتعمل فيه ايه ؟؟؟

رانيا مثلا فكرت الساعه اللي جابتها لعصام القزعه ملبسهاش ولا مرة ليه ؟؟؟ طب مثلا الولاعة اللي جابتها طمطم للواد عزت قدامنا ولا مرة شوفناها معاه كمان السلسة الدهب اللي جابتها رشا لمحسن راحت فين ؟!!! طب بلالالالاش كل دول بلاش أنا لما جبت لخالد السنة اللي فاتت الأعمال الكاملة لشكسبير ولامرة شوفتة بيقراها ولا قالي انه فاتحها اصلا – عاااااااااااااااااا

الولاد عاوزين يقوموا يضربوا مصطفي لأنه كشف عن السر الخطير ده بس كان فات الآوان والخبر انتشر وقامت الحرايق في كل حتة بين كل الكابلز وكل واحدة بتحقق في الموضوع رانيا ماسكة عصام القزعه من رقبتة واتضح ان المزاد اللي كان معمول من اسبوعين في الحوش الوراني كان علي الساعة اللي جابتهالو ، الولاعة بتاعه طمطم اللي كنا شاكين انها نفس ولاعه أستاذ أنيس بتاع الجغرافية طلعت هي ، رشا زنقت الواد محسن وضغطت عليه ضغط الشبشب للصرصار فأعترف انه باعها علشان يدفع مجموعة التقوية ومستخسره فيه يعني حتة سلسلة دهب وهو يتيم الأم وابوه طفشان وهو عمل كده علشان ايه مش علشان ينجح ويتفوق ويبقي جدير بيها – وبفلوس ابوها - انا بقي خالد حلفلي براس امه انه متصرفش في المجموعة وملقحة عندهم في البيت مع التنبيه عليا اني لما اجيبلة هدية افكر في حاجة تصلح للألفيه الجديدة !!!! وناس تهدي النفوس وناس تطفي الحرايق وكان لازم مصطفي يدفع التمن غالي ( غير انه انضرب لأن ده مكنش كفاية وكان عادي بالنسبه له)

وطبعا اتردتلة في هداية عيد ميلادة اللي كانت عبارة عن ( علبة سمنة روابي – بافيتة – تتينة – قصافة - .... وأشياء أخري من هذا القبيل ) وتخيلوا بقي شكلة وهو بيفتح الهدايا اللي كانت ملفوفة أخر شياكة ( الهدايا دي كانت فكرتي ) نياهااهاهاهاهاها

ومن يومها وانا بتبع نفس النهج فيما يخص الهدايا الولادي اهو منها أضمن انها مش هاتتباع ومن ناحية تانية نهزر ونضحك ومن ناحية تالتة نوفر الفلوس لحاجة تنفع ويبقي عملنا الواجب

لحد مكان في عيد ميلاد حد عزيز عليا قوي وقولت لالالالالالالا يابت خلاص كبرنا بقي واللي بيهادي بيهادي قيمتة وعلي قد معزة الشخص اللي قدامة وبعد فحص وتمحيص ولف ودوران وطلوع ونزول ومشاورة الزملا من الرجالة جبت الهدية اللي أستقبلها هو بمنتهي الشياكة والسعاده وبعد ماروحت اتصل بيا يشكرني جداً وبيعتذرلي انه مش هايقدر يستعملها لأن معندهوش مفاتيح يحطها فيها !!!!!!!

ميرا في المطبخ

2010-08-15T05:11:00.000-07:00

حدثت أحداث هذوه الموقعه السنة اللي فاتت لما سيبت الشغل وركنتلي في البيت كام شهر كدة لا شغلة ولا مشغلة وصباح الأنتخه.
ومرة من ذات المرات لاقيت ماما بتندهلي ومتعصبة
- يا خيبتي القوية انتي هاتفضلي لازقة قدام الجهاز كدة قومي أعمليلك منظر وساعديني في أي حاجة
- هو انا اعترضت يا مامتي قوليلي بس عاوزاني أعمل ايه وانا من عنيا
- طب يا شملولة قومي أغسلي المواعين المكومة في الحوض دي
- !!!!!!!! مواعين ... أنا ... عاااااااااااااا لا شوفيلي حاجة تانية
- لا هاتغسلي المواعين وتشطبي الحوض وتنشفي الأرضية
طبعا قومت رغم أنفي ووداني كمان ودخلت زي الشطورة كدة وشمرت عن كومامي واستعنت علي المواعين بالله
وطبعا لا يخفي علي اي حد أن غسيل المواعين يلزمة صابون مواعين وسفنجة أو سلك مواعين وفي طبق أو علبة كدة علي كل حوض في كل بيت دي اللي بيتحط فيها الصابون وتغمس فيه السلكة أو السفنجة
حلو كدة ... زي الفل ومفيش مشاكل ، دخلت انا بقي المطبخ وبصيت يمين وشمال وحطيت الصابون في أيد والسلكة في إيد و انا بردد الرائعة الشعبية
- أنا أغسل أغسل اغسل ياهانايا في يوم غسيلي
المهم أني لاحظت ( خدوا بالكم من لاحظت دي ) ان الصابون مش بيرغي بس مع ذلك ولا همني و لا تأثرت ولا تراجعت ولا حااااااجة
وبعد كام كوباية علي كام طبق كدة لاحظت برضة أن الكوبيات والإطباق مش بتنضف
قعدت أفنكر و أفنكر يا تري المشكلة فين ؟؟
قولت لروحي يا بت يا ميرا يمكن الصابون قليل ؟؟ زودت الصابون مفيش فايدة
يمكن السلكة نوعه مش كويس ؟؟ غيرت السلك وبرضة الأطباق مش بتنضف والكوبايات شكلها ميسرش
قولت لروحي وبعدين في الخيبة القوية دي ماما هاتقول عليا ايه ؟؟ بصي يا ميرا أكيد أكيد الصابون ده فيه حاجة وبايظ وانا لازم أشهد ماما عليه أه مش هاسكت أنا طبعا
- مااااااااااااااااما يا ماما – انا من المطبخ –
طبعا ماما أتخضت وجت جري علي ملي وشها ( ونعم الأم بصراحة )
- ماما الصابون ده مش بينضف الأطباق والكوبايات ده شكلة بايظ ؟
- بايظ أزاي وريني كدة
طبعا ماما مسكت إزازة الصابون وقلبتها في ايديها ، وبعدين سألتني بمنتهي الهدوء انتي جبتي الصابون دة منين ؟؟
- من الضرفة دي يا ماما ( وشاورتلها عليها )
- برضة بمنتهي الهدوء طب يا حبيبة أمك عرفتي منين ان فيها صابون ؟؟
- مهو باين يا ماما شكلها شكل قزايز الصابون
- طيب ممكن كدة تقريلي مكتوب عليها ايه ؟
طبعاً خدت الإزازة وانا بقول لروحي ايه الأم الغريبة دي هايكون مكتوب عليها ايه يعني أهو شوفتي شامبو للسجاد والإنتريهات !!!!!!!
وطبعا من هذا المزنق مقدرتش أفتح بقي بكلمة ولا نص وماما ناولتي الصابون من تحت الحوض وهي لسان حالها بيقول
- أشوف فيكي يوم يا خبيتهم – حسبي الله ونعم الوكيل

حق القلب الحصري

2010-05-25T04:50:00.001-07:00

من اكتر الحاجات اللي بتغيظني وبتفرسني بجد قناعة معظم الولاد انهم ذوا تأثير لا يمكن محوه ، نفسي اعرف ايه السبب في القناعة دي وجابوها بناء علي ايه؟

كل الولاد دون جوانات ( جمع دون جوان ) ومقطعين السمكة وديلها ومفيش بنت عمرها استعصت عليهم والبنت اللي تنول شرف معرفتهم لا ينكن أبداً ينمحي من ذاكرتها ؟؟؟؟!!!!

ليه ؟؟ سؤال نفسي الاقي علية اجابة واصلا بسأل السؤال دة ليه ؟؟

علشان مبدئياً كدة قابلت في حياتي عدد لا له أول ولا اخر من الولاد وفي جميع المراحل العمرية يعني من ابتدائي لحد الجامعة – في مدارس مشتركة - لحد كذا سنة شغل مفيش فرق بين ولد صغير او مراهق أو راجل كبير جميعهم بلا إستثناء عندهم نفس الفكرة سواء كان صديق قديم – زميل دراسة – حبيب سابق – مشروع إرتباط وفشل تلف الدنيا لفتها وترجعوا تتقابلوا فيستقبلك بنفس القناعه

الحكاية دي بقت بتكرر بشكل يضحك وثقة مستفزة لدرجة ان في ناس تحلفلهم بالمصحف انهم ولا علي بالك ولا اصلا انت فاكرهم ولا اختفائهم مثلك اي شئ ومع ذلك يكدبوك بمنتهي الرزالة والتناحة واضطر ساعتها بقي اقلب علي الوش التاني واطلع لساني الطويل الزفر في ذات نفس الوقت

يعني لما اللي قدامك يبينلك حجمك الحقيقي في علاقتة بيك بترفض الفكرة ليه وبتكدبها ؟ وتفسره علي انه تقل ؟؟

ودي اسخف حاجة في الموضوع تبقي بتتهرب من هذه الشخصية او بتفهمة بصراحة ووضوح ان علاقتكم ايا كان مسماها مش هاينفع تستأنفوها والطرف التاني بيقول لروحة دة تقل ؟؟؟!!!!

علي فكرة انا شوفت بنات كتير فاكرين نفسهم في جاذبية إليزابيث تيلور وإغراء مارلين منرو وحضور أودري هيبورت لكن مع ذلك البنت معندهاش قناعه "أنها تقبع في الذاكرة كبقعة حبر تغلغلت في ثوب قطني يخف أثرها نعم لكنها لا تمحي"

الولد او الراجل بيبقي فاكر انه اخد قلب البنت توكيل وحق عرض حصري مع ان يعني اصلا الرجالة اللي عليها النطال ( يعني اللي رجالة بجد ) بقوا قلة مندسة الرجالة للأسف لا بقت جنتلة ولا شهامة ولا ثقافة ولا حاجات تانية كتير ومع ذلك كل واحد نافش ريشة زي الديك الرومي !!!!!

يالههههههههههههههههههههههههههههههههوي

شوية أسئلة غايظاني

2010-04-13T09:05:00.001-07:00

في شوية أسئلة كدة عمالة تزن في دماغي بقالها فترة ياريت حد يجاوبني عليها ويقولي انا بفكر صح ولا غلط ؟

من كام يوم كدة كنت قاعدة في الشغل وأثناء الكلام مع زميل ليا عن السوياسة اللي كل الناس بتحب تتكلم فيها ومبتحبش تمارسها

قالي شوية حاجات كدة خلتني افكر هو التاريخ اللي احنا بندرسة صح ولا غلط؟؟

هاتقلولي ياعني ايه يابت يا ميرا يعني معروف ان التاريخ بيكتبة المنتصر وبناء عليه بقي عندي شوية تساؤلات كدهون

الجملة الشهيرة أن جمال عبد الناصر أول مصري يحكم مصر من عصر الفراعنة ؟؟؟

أومال الملك دة كان إيه ؟؟ يوغسلافي

يردو عليا يقولولي لالالالالالالا ده كان تركي

ياحلولي والنبي صحيح لا هو مكنش مصري محمد علي أصلا مكنش تركي تخيلوا بقي كان ألباني طب سيبكم من محمد علي أزاي تقولوا علي واحد جد جد جد جدة أتولد في مصر مش مصري !!!!

طيب حلو قوي أشمعني يعني العائلة العلوية هي اللي مش مصرية وفين كل الجنسيات اللي جت مصر واستقرت فيها وبقت مصرية بالمولد والنشأة ؟؟؟

طيب اساساً اساساً مين اللي حط محمد علي علي كرسي الحكم مش محمد كريم طيب نفسي اعرف بعد ما محمد كريم طرد الفرنساويين ولي محمد علي ليه ؟؟

مكنش هايقدر علي المماليك ؟؟ مهو محمد علي دباحهم

علشان مصر تحت الولاية العثمانية ؟؟ محمد علي حارب الآستانة وأجبرهم علي الإستقلال !!!

شوفوا مفيش في دماغي غير سبب واحد ان المصريين في الوقت ده كانوا مقتنعين ان مينفعش يحكمهم مصري

سيبوكوا من دي بيقولوا أن المصريين شاليين من الخديوي علشان حفر قناة السويس بالسخرة انما احنا لما عملنا قناة السد العالي دفعنا مرتبات للناس

طيب انا بفكر كدة هو قناة السويس اتحفرت سنة كام ؟؟

1859- 1869 الفترة دي كانت نظام السخرة نظام موجود وشائع يعني لا الخديوي سعيد ولا الخديوي أسماعيل أخترعوه وكانت العبودية لسة معمول بيها

طب علمكم بقي السخرة كانت أيام ملوك الفراعنة برضة وكانت سمة أي مشروع قومي عملاق ، خلونا نتفق ان المؤرخين أجمعوا ان شروط حفر القناة كانت مجحفة و جت علي مصر و … و … لكن برضة نكون موضوعين شوية وموضوع السخرة دة استغل اعلامياً جامد يعني وكفاية التاريخ اللي درسناه في المدارس

طيب حاجة كمان بقي ضاغطة عليا قوي قوي بيقولوا أن الثورة خلت التعليم مجاني طب سؤاااال

هو قبل الثورة كان بفلوس ؟؟؟

اه كان بفلوس بس يعني الثوار مش أستفادوا من نظام التعليم ساعتها مهما كانوا ولاد ناس من الشعب يعني الفقرا برضة كانوا بيتعلموا ؟

طب سؤال كمان بعد اكتر من 52 سنة علي الثورة ولسة عندنا نسبة أمية عالية ورغم مجانية التعليم فالتعليم الحقيقي حاليا هو اللي بفلوس ومش اي فلوس كمان ونظام المجانية أثبت فشلة ومبقاش مجاناً خالص

طويب بلاش دي الإصلاح الزراعي !!! لا هي الزراعه كانت بايظة أصلا وأتصلحت طيب بصوا كدة لحال الزراعة دلوقتي

خمس فدادين اتفتتوا مع الوراثة واللي اخد خمسة كل ولد من ولادة فضلهم كام قيراط واللي من بعدهم كام سهم

وبرضة التجربة اثبتت فشلها لأن الزراعه علشان يبقي ليها عائد إقتصادي لازم تبقي في مساحات كبيرة والدليل علي كدة المزارع في بلد زي أمريكا اللي هي قوة افتصادية زراعه وصناعة الملكيات الزراعيه فيها كبيرة جداً

طيب ليه كل الناس بتقول ان ما قبل الثورة كان عهد إقطاعي شرير طيب هو مين بني جامعه القاهرة ؟ مين بني خزان أسوان ؟ مين اللي أنشأ المتحف المصري ؟ مين اللي أنشأ استوديو مصر ؟ هي مصر كانت خربانة وعمرت ولا ايه يا اخونا حد يقولي

يالههههههههههههههههههههههههههههههههههوي

التاريخ بيعيد نفسه بغباااااااااااء

2010-04-04T02:35:00.001-07:00

كلنا صحينا من النوم أمبارح علي خبر أعتقال الناشر الشاب أحمد مهني من قبل أمن الدولة

والخبر علي قد ماصدمني وضايقني لكن غاظني للدرجة اني هاكتب في المدونة اللي بقالها شهور خارج نطاق الخدمة

مبدئياً كدة بعد ما مهني يخرج بالسلامة إن شاء الله بنصحة انه يوجهه شكرة للجهه اللي كانت محتجزاه ودة طبعاً لأنها عملت دعاية مجانية لكتابة بمليون جنية وأكتر واكيد إن شاء الله الكتاب توزيعه هايزيد ويتباع خصوصاً بعد إشاعه مصادرة الكتاب

وكمان والحمد لله اسمه بقي ملء السماع والأبصار زي ما بيقولوا مش بس في مصر والخارج كمان ولو أن حلم أي كاتب أنه يشتهر بكتاباته مش بسبب جهات أمنية بس الأمر لله من قبل ومن وبعد

بس الغريبة بقي هو منطق هذه الجهات في التعامل مع الأشخاص بالشكل ده , نفس السيناريو بيتكرر بعد ما قبضوا علي إسراء وبدل ما يمر يوم ستة ابريل يوم عادي أعترض فيه البعض علي الغلاء أو أي اعتراض بقت مواجهات عنيفة مع الأمن في المحلة ، وبقت ستة أبريل حركة اقل تحرك ليها بيسببلهم أزمات وكل شوية يجروا عربات الأمن المركزي ويكردنوا ويعتقلوا

التاريخ بيعيد نفسه دي حقيقة لكن بعض الشعوب بتتعلم من التاريخ لكن عندنا التاريخ أشبة بأغنية مهنجة بتعيد نفس المقطع

ونرجع كده نبص لورا ونشوف افلامنا سجلت ايه عن القلم السياسي وفي الحقيقة محدش قالنا هو كان اسمة القلم ( يعني قسم ) علي أساس ان ده كان التقسيم الإدراي ولا الألم ( يعني وجع ) نسبة للألام علشان يخوفوا الناس اكتر وطبعا محدش ممكن ينسي أفلام زي غريب في بيتي وشروق وغروب ومصير هؤلاء بعد الثورة كلنا عارفينة وأن طريقتهم الغريبة دي في قمع الناس والأفكار ادت إلي نتائج عكسية

وبعد الثورة وظهور زوار الفجر وفيلم زي الكرنك اللي عاد إلينا أمجاد الألم السياسي ومشهد النهاية الشهير اللي بيدخل فيه كمال الشناوي المعتقل أثر ثورة التصحيح وعداله السماء ان يكون الجزاء من نفس العمل وإلي مذبلة التاريخ

وبنفس التكرار ونفس الأسلوب ونفس المنهج بتتعامل الجهات الأمنية دلوقتي ومش عارفة ياتري التكرار ده سببه ايه ؟

اننا مش قادرين نتعلم من التاريخ ؟؟ ولا لأن في قناعه أن هي دي الطريقة المثلي للتعامل معانا كشعوب ؟؟؟

أخيراً مبروك للدكتور البرادعي التفاف الملايين حوله وحلم الثورة الخضراء.

الراجل مش بس بشقته

2009-11-08T13:13:00.000-08:00

لاء بجد متغاظه ، لدرجة إني بكتب أهو ..........هو من أمتي بقي البني أدم مننا بيتقيم بشوية حاجات ، من امتي الواحد بيشوف نفسة شقة وعربية وموبايل ووظيفة؟؟؟؟؟

بقول الكلام ده بعد ما نصيبي اللي عارفاه وقعني في نموذجين في شهر واحد ... وخبطتين في الراس توجع

الأول كان في صالون بيتنا العامر وبعد مفاوضات ومشاورات قولت يلا اهو أحنا داخلين علي موسم وكده كده ها نفض الشقة اعملها بجميلة بقي وبعد كام خناقة مع الحاجة علي هالبس ايه والف الطرحة أزاي وتوهان العريس في الطريق قعدنا في الصالون مع اهله وابتدينا التحقيق عندك كام سنه ؟ درستي إيه ؟ بتشتغلي فين ؟ من أمتي ؟ من كام لكام ؟

ياربي مكنش فاضل غير اني اتسأل بأقبض كام ؟ المهم عديت وجاوبت وكل ده والعريس قاعد في الكرسي منفوش ومبتسم 4×4 وكأنه أبو زيد الهلالي وجاي يفتح تونس الخضرا .

مطولش عليكم بقي قولوا طولي باباه طلب اننا نقعد مع بعضينا وراح مشاور علي السفرة قولت فرصتي بقي المهم قولتله خد فرصتك واحكيلي عن نفسك

نفسه دي بقي كانت عبارة عن الشقة ام حمامين الـ 165 م علي أساس إن شقتنا بحمام واحد وطبعاً ده بالنوسبه ليا املا . وهنا اخواني كان ليا وقفة كله الا حمام بيتنا ده ليه مكانة خاصة في قلبي ده منطقة تأملي المفضلة واهانة لن اسمح بها بس قولت يابت طنشي خاااااااااااالص وافتكري اللي الحاجة هاتعملة لو ابتسامتة تضائلت 2 ملي بس ، ماشي يا سيدنا غير الشقة ام 2 حمام ... اه الـ 165 م ، عربيتي وإن شاء الله بشوف وظيفة احسن وبس ....

يعني ايه وبس طب هاتتجوز ليه ؟ جاوبني إجابة مش مقنعه ، طب ايه مواصفاتك في البنت اللي عاوز تتجوزها ؟ تقريباً مفيش مواصفات وكان ناقص يقولي اللي هاتوافق عليا هاتجوزها وتكون بتعرف تطبخ كويس – مش عارفة ليه ترددت في أذني رائعة الجميلة صباح عاوز طباخة سكة حديد - ، طب ياعمنا إيه طموحك في الحياة ؟ فالاقي ان طموحة توقف عند الشقة الـ 165 م

وقتها قولت لنفسي شلوه من قدامي وخلوه يروح مع أهله سليم والحقيقة زي مايكون بابا استشعر هجوم قادم وهو عارفني بقي لما اقوم بهجوم مضاد فلم الليلة وانهي المقابله وعملني تسليتة طول الليل كل ماشوف وشي يقولي وافقي يا عبيطة الراجل عنده شقة بحمامين ........هع هع هع هع – هو ده بونتي –

النموذج التاني بقي فرسني فرسني بجد وكان لقائي بيه صدفة وهو نوع من الشخصيات اللي في كل كلامة لازم بطريقة غير مباشرة يعرفك انه هايغير عربيتة في اقرب فرصة وانه دفع في اللي معاه دم قلبة ومش هاتساوي لما يبيعها وشوية ويجيب سيره اتحاد الملاك اللي بيطالبه بنور السلم وهو لسه مش ساكن فاتفهم بالحداقة ان الشقة تمليك وبالمناسبة قال وبمنتهي الفخر ان الشقة مش بحمام واحد ولا اثنين لالالالالالالالالا بتلاتة – نفسي افهم ايه علاقة الفشخرة بحمامات الشقة – وانه عضو في اتنين من أهم نوادي العاصمة .

المهم اني مطيقتش اقعد مع الشخصية دي اكتر من ساعه واستحمل غروره وصلفة وهو بيكلمني علي اساس انه لقطة وان البنات بتترمي عليه وانه خليفة حسين فهمي في زمانه ولم تفلح محاولات تطنيشة او الإنشغال بالحديث مع احد من الجمع فعنده اصرار غريب علي تعريفنا بجميع مميزاتة السابقة الذكر للي يعرف واللي مايعرفش فانسحبت من القعده وانا مستغربة أزاي الرجالة باصه لنفسها البصة دي شايفين انهم لقطة بالشقة ام كذا حمام

طب فين الشخصية ؟ فين الحضور ؟ فين الطموح ؟ فين الثقافة ؟ فين الرجولة ؟؟؟ دي بالذات فيييييين ؟؟؟؟؟؟

وعلشان كده بقول اهو الرااااااااااااجل مش بس بشقتة اياً كان عدد حماماتها

يالههههههههههههههههههههههههوي

تااااااااااااااااج قبل رمضان

2009-08-20T16:22:00.000-07:00

التاج ده جالي من الجميلة ليساندرا من مدونتها علي الهامش وبصراحة وانا بقلب في الجهاز كدة لقيتة بقالة مدة وقرب يحمض قولت الحقة بالسكين قصدي بالتدوين

س : من أنت؟

ميرا

س : ما الذي تفعله هنا؟

أهو كل ما بتغاظ باجي أهدي أعصابي هنا شوية وأغيظكم يعني دمي هايتحرق لوحدي

س : إسرائيل تقصف كل جنوب ممكن بحثاً عنك …أي شمال تقصد؟

هاقصد الساحل الشمالي الأفغاني هههههههههههههههههه
نتكلم جد بقي انا مش هاتعتع من مكاني لأني مش من طبعي الهروب بواجه واللي يحصل يحصل

س : أنت مكلف بحذف حرف من حروف اللغة العربية أيها ستختار … ولماذا؟

مش هاختار ولا حرف هاطلب أعفائي من المهمة دي لأن حذف أي حرف معناه تغيير أو حذف كلام كتير وعلي إيه اللخبطة دي اللي نعرفة أحسن من اللي منعرفهوش

س: لو قدر لك أن تدخل السجن فما القضية التي تتمني أن تدخل بها إليه؟

لية بس السيرة دي لا مليش انا في السجن والحبس والحاجات دي انا قلبي قلب عصفور لو اتحبس يموت بس ده لو قدر ومكتوب وومنوش مهروب هادخل في قضية إغتيال شخصية سياسية J

س: متى اكتشفت نفسك؟

لا لسه مكتشفتهاش انا بحاول ولا اكتشفها وارتاح لا أفضل طول عمري أدور عليها

س: على مفترق طريق لافتتان اليمنى تقول إلى حلمك والثانية تقول إلى مالم يحلم به بشر … أي الطرق تسلك؟

هو أول ما هقرا الكلام ده هاختار مالم يحلم به بشر لأن هايبقي عندي فضول أعرف ايه اللي ماحلمش بيه البشر أنما بقي لو ربنا هداني ورزقني بحد ناصح أمين هاختار حلمي لأني عايشه علشان أحققة

س: نحن لا نعيش حياتنا بل نتعلم فيها كيف نعيش … مع تعليقك؟

موافقة طبعاً بنتعلم كل يوم والدنيا ياما بتعلمنا وعلي رأي اللي قال يعيش المعلم ويتعلم

س: بجملة واحدة فقط أكتب تعريف لكل كلمة من الكلمات الآتية

الوطن : حلم مسيرة يتحقق في يوم

الأم: جملة واحدة مش كفاية مامتي انا بالذات محتاجة معلقة

الليل: أنا من عشاقة الدنيا فيه غير الدنيا

الحب: أجمل شئ في الوجود والأجمل انه يبقي نبع متجدد مهما تاخد منه ميخلصش

أمريكا: خدعة كبري أسموها حلماً

المرأة : عندها تبدأ وتنتهي الحياة

الإنترنت: صديقي الصدوق

س: قيس، عنترة، وجميل… هم الذين يقولون شعراً، وليلى، وعبلة، وعزة صموت… لماذا هذا التغيب للمرأة؟

مين قال ان هذا تغييب للمرأة المرأة هي ملهمة هؤلاء الشعراء ومن ناحية تانية صعب علي المرأة الشرقية انها تبث حبيبها أشواقها ومشاعرها وتجعلها ملء السمع كده ، ده بيتنافي مع حياء المرأة

س: أن تكون مطلوباً في جريمة خير لك من ألا تكون مطلوباً على الإطلاق… هل تتفق مع هذه العبارة؟ علل؟

لا طبعاً هو لازم أبقي خارج علي القانون علشان يبقي ليا وجود ما انا ممكن اكون مطلوبة برضة بس لأسباب كويسة

س: إلى أين تمضي كلمات الحب بعد أن نقولها؟

علي اللي بيقولها واللي بيسمعلها الكلام اللي الغرض منه الكلام مش بيروح لأبعد من قرقوشة الودان اما الكلام اللي من القلب اللي رايح لحد بيقدر وبيحس حقيقي بيعدي لقلب القلب كمان

س: هل تجد علاقة بين المرأة وقطاع الطرق؟

فين العلاقة دي مش شايفاها خالص

س: هذا فراق بيني وبينك … متى ولمن تقولها؟

أقولها لما أحس اني مش هاينفع ابص في وش الشخص / أو الشخصة دي وأبتسم مش بحب أخبي اللي في قلبي ولو قلبي شال من حد أو في حد نزل من نظري يبقي هذا فراق بيني وبينك

س: كيف هو غداً؟

مش بحاول أتخيلة طبعاً بتمناه احسن بس بستناه علشان اعيشه

س: لمن تمرر التاج؟

ج: اللي يحب يتفضل ميغلاش عليه … بس بسرعه قبل ما يحمض

مين صاحب الفكرة الهباب دي ???!!!!!

2009-06-24T07:22:00.000-07:00

بجد نفسي اعرف مين صاحب فكرة ان اسوار المدارس الحكومية والخاصة – أحياناً – يترسم عليها علشان اقوله فكرة حضرتك هباااااب هباااب ، منتهي التلوث البصري اسوار المدارس بقي شكلها بشع زي العجوز الشمطاء اللي بتحط ميكب بغباء يعني في طريقي من الشغل للبيت بعدي علي 3 – 4 مدارس حسب الطريق اللي بياخدة الميكروباز وياسلام بقي لو رايحة فيصل عند اختي الشارع فيه ما لا يقل عن 4 مدارس كلهم أسواء من بعض بالكتابات الركيكة والرسوم اللي شبة رسوم أطفال الحضانة وغالباً كانت الغاية تجميل هذه الأسوار ومنع وضع الإعلانات عليها لكن التنفيذ جه اكتر من سئ طبعاً دة متوقع لأن كل مدرسة مسئولة عن دهان السور بمعرفتها وفي النهاية بترسي علي خطاط جنبهم

يعني يوم ما نفكر فكرة كويسة ننفذها تنفيذ هباب الرسومات الموجودة علي أسوار المدارس منظر في منتهي البشاعه يعني كان هايحصل إية لو وزارة التعليم نسقت مع وزاةر التعليم العالي وسابت الأسوار دي لطلبة فنون جميلة كتدريب صيفي علي الأقل مكناش هانشوف المناظر اللي تجيب الإكتئاب دي

يارب صبرني علي العيشة في البلد دي

يالههههههههههههههههههههههههههوي

اعترافااات مدون..........أنتظرونا

2009-04-26T19:09:00.000-07:00

التاج ده مش عارفة أسمة بس هاسميه اعترافات مدون جالي من منوشة صاحبة مدونة مخنوقة ومع اني مش بجاوب علي تاجات وببدلها بتوك وبنس شعر زي ما انتم عارفين بس مرضيتش اكسفها وهدية مقبولة يا منوش المرة الجاية هابدل ماشي
اسمك....؟
أمممممممممم بتاع المدونة ولا بتاع الحكومة ;)
مشيها ميرا
المشهور بيه وسط اصحابك ؟
لا بقي أنا اصلا اخويا من أكتر الأسامي بتاعتي بيفكر يبلغ عني نصب وإحتيال مش هاقدر أدي أمثله كده هاذكر أسماء آليت علي نفسي ( جامدة آليت دي ) أني مذكرهاش
سنك...؟
عادي خالص انا صحيح وومن بس ولا تفرق معايا حركات وكلاء النيابة دي تمنتاشــ ... عشييــ ... هو من الأخر داخله علي سبعه وعشرين بس هالف وارجع تاني :P
مجال دراستك ؟
إدارة الأعمال يا أفندم وده كان إختياري من وانا في إعدادي غالباً عندي مبادئ إستبداد والله أعلم
اسم مدونتك ..؟
حاجات تغيظ يا بيه – ده تاج ده ولا محضر شرطة – ايوة كل ما بتغاظ با جي افضفض هنا
الصوره الرمزيه لمدونتك بتعبر عن ايه ...؟
الصورة المزرية !!! أأقصد الرمزية يا باشا بتبعبر عن اسمي اللي بمضي بيه اللي هو وومن واخترتها بنوته جميلة بهدوم النوم بتبص من شباك وعجبتني لأنها بسيطة قوي أحم أحم أنثوية قوي
هل فكرت في اغلاق المدونه ؟ والسبب ..؟
انبوسيييييييييييبل – ايوة هي دي بتاعه توم كروز – اما اجيب ضرف دي اومال افضض فين ؟؟ هه ؟ أمشي بقي أكلم نفسي زي المجانين
ايه رد فعلك لو حد قل ادبه عليك في تعليق ...؟
طيب قصدك قلة أدب قلة أدب هايبقي هوه اللي جابه لنفسه صحيح انا هنا بهنزر وبضحك وقالباها مرجيح انما أي حد تسوول له نفسة بالإستظراف أو الإستخفاف أو قلة الأدب هايشوف ردود غير متوقعه وبالأدب برضة
اسوء مدونه...؟
مدونة صاحبها كان معلق عند زميل مدون تعليق أقل ما يقال عنه انه غير مهذب ودخلت اشوف ايه الحكاية ويارتني ما دخلت ونستفيد من الموقف ده ايه ؟؟؟؟
كل تعليق ينضح بنوع صاحبه
هيحصل ايه للايميل بتاعك لما تموت...؟
مفكرتش في الحكاية دي خالص غالبا هايتقفل لأني مش هابقي بستعمله ولو حسيت اني هاقابل وجه كريم ممكن اطلب من اصحابي يحذفوا ميلي علشان مش يفتكروني كل ما يفتحوا ميلهم الفراق صعب
اديت الباسوورد بتاعك لحد ...؟
أيوة مرة واحدة بس ومش هاكررها تاني ابداً ابداً ابداً ( إن شاء الله يعني )
السفر بالنسبالك ايه ...؟
يالهوي يالهوي انا قايمة نايمة أكلة شاربة واخده شور بحلم بالسفر ، ده أجمل شئ ممكن اعملة في حياتي طب ده انا حتي لو عندي سفريه الصبح مش بنام من كتر الفرحة حتي لو مسافرة الفيوم.
المود بتاعك ؟
هع هع هع هع هع انا اصلا برجي مائي يعني متقلب متقلب متقلب افرح من غير سبب وأزعل من غير سبب وممكن افرح وازعل في دقيقة واحدة وممكن ابقي هادية ورايقة زي يوم مشمس ومزعببه وثائرة زي عواصف المحيطات – أيوه الشديدة دي اللي بتطلع في الأفلان الأجنبي -
بتعمل ايه في وقت فراعك..؟
وقت فراااغ .... وقت فرااااغ .... وقت فراااااغ الكلمة دي بتزن في دماغي مصاحبها هرش في راسي – لاء مش علشان بزعج السكان ;) بحاول أفتكر معناها عموما أحتمال احسب الوقت اللي بقضية في المواصلات وقت فراغ بس في الغالب هاريح عنيا من الكي بورد والشاشة وأمليهم بالتليفزيون :D
وأقولة يا ما انتا وحشنيييييييي
الأكلة المفضله...؟
باكل كل الأكل والحمد لله ماعدا اللي بيعملي حساسية بس المفضل المفضل محشي ورق العنب ، البط والسمان ، الجنبري والكابوريا ، فته الكوارع ، ولحمه الراس ، الفاست فود عموما ، الفول بالبيض
الصفات اللي ورثتها عن والدك.؟
ورثت شكله انا شبهه خالص خالص وكمان طريقة تفكيره
الصفات اللي ورثتها عن والدتك ..؟
ولو أن صعب عليا ان أعترف كتابتة بالموضوع ده بس بالرغم اني ورثت بابا في الشكل اخدت صفات ماما من جواها مش عاوزه بقي اشكر في ماما علشان شهادتي مجروحة لكن اللي بيصعب عليا الإعتراف ده اني ياما لومت ماما علي طيبتها الزياده وتسامحها في حقها وكنت بشوفه ضعف منها لكن في الحقيقة لما اكتشفت اني اشبهها من جواها وانه مش ضعف ولا حاجة اضايقت من نفسي قوي قوي علشان اكيد كلامي كان بيضايقها
اكتر ست حاجات بتكرهها...؟
الكدب ( كلنا بنكره لكن مش بنتورع عن ممارسته بدرجات ) – الخيانه ( مؤلمة لدرجة لا توصف ) – الناس اللي بتلبس ماسكات – البنات الهايفة – الشباب المايص – ان حد يخذلني
اكتر ست حاجات بتحبها...؟
بحب عيلتي جداً وهما اول وتاني وتالت حاجة بحبها
بحب النجاح قوي
بحب الناس وخصوصاً أصحابي
شخصيتك نوعها ايه....؟
علي حسب مين اللي شايفها معظم الناس شايفاني حد قوي وجامد واسد في أي مصيبة والكلمة اللي بتغظني قوي انتي قدها وقدود – نفسي تغيروها – في ناس شايفة اني حد هادي قوي وطيب وغلوبه( مخدوعين ) :D
في ناس شايفة اني سوسه وحويطة وبيتهموني لا سمح الله ان مخي نضيف ( فاهمين غط )
في ناس شايفة اني حد لذيذ ومسلي وقاعدتة حلوة
وناس شايفة اني حد نكدي بتاع مشاكل
الخلاصه انا شايفه نفسي ازاي انا كل دول في بعض وبستمتع جداً بكوني خلطة من الشخصيات المتناقضة
الشغل بالنسبة لك ايه...؟
الشغل هو حياتي بجد بلاقي فيه نفسي وطموحي ومش متخيلة حياتي من غير شغل ولو اني موظف من نوع خاص يعني مينفعش معايا الدلع دايما لازم اضغط واطحن علشان اادي أداء عالي بابقي بعيط وبشد في شعري وبشهد طوب الأرض علي مديري اللي مرمطني وانا من جوايا مبسوطة بأني مش بخيب ظنه فيا أبدا والحمد لله وبموت في انه يتحداني ويرازيني بحاجة مش بعرف اعملها واخلصها علي احسن ما يكون
لماذا دخلت عالم التدوين ...؟
هو سبب واحد مفيش غيره اني قال ايه اطلع الزن اللي دماغي اتاريني كل ما اطلع شوية زن تشحن زن تاني اطلع شوية تشحن زن تاني وكمان بقي ايه في كل الإتجاهات انا ساعات بخاف علي دماغي مش بتبطل زن لا ليل ولا نهار
اجمل كلمه اتقالت في وصف مدونتك.....؟
هو في الحقيقة الكلام كتير والنقد الإيجابي علي قفا من يشيل في المدونة دي ولا التانية ( في الحلم طبعاً )
ده انا حتي حالي واقف والسوق عندي مريح اليومين دول
لا بجد أي حد بيشوف في اللي انا بكتبه ده أي قيمة بيبقي كأنه كتب في مدونتي معلقة بحالها
أهمية التعليقات بالنسبه لك ؟
مهمة جداً بس مؤخراً بقيت أهتم أن الموضوع يتقري كويس أكتر من عدد التعليقات انا حتي بفرح قوي لما الاقي حد بيقولي انه بيقرالي ومكنش بيعلق ودي بتحصل كتير
احسن بوست كتبته ....؟
لسه مكتبتوش
افضل بوست قرأته ...؟
لا كتيير أكتر حاجة محبباني في التدوين انه بالنسبة ليا زي الحديقة الغناء – منين متبص تلاقي زهور وورد ورياحين – صحيح مش هانكر اني في جنب المجاري بعيد عنكم طافحة فيه بس عادي مش بقيت اعدي من عنده
افضل مدونة قرأتها ...؟
لا خير ربنا كتير والحمد لله بس بجد في مدونات لازم لازم اقراها وفي ناس بلاقي كدة ايدي راحت علي الماوس ودخلت عندهم علي طول
زي مين كدة :
بطووووط بنت الإسلام
آبي وكوكبها
البت اللي مش خيخة وأي كلام
فاتيما روح قلب ماما
وليد عارفة...مش عارف ليه ؟
قوس قزح
يالهوي كده هانسي ناس كتير – ربنا يسامحك ياللي في بالي -
النت بالنسبالك ايه...؟
إدمان ومن زمااااااااان جداً وعشرة عمر ( اه والله يجي من 10 سنين كده ) اسوأ كام ساعة ممكن يعدوا عليا لما الشركة تقطع النت في البيت واستني علي نار لحد ما اروح الشغل وتبقي كارثة لو لا قدر الله فصل في الشغل كمان
تمرر التاج لمين...؟
لا المرة دي تدبيسه واللي مش هايجاوب علي التاج هو حر السته اللي تم ذكرهم فوووق يجاوبوا يعني يجابوا الناس الكسلانه اللي مش بتحب تعمل الواجب انا عندي امتحانات صحيح ومش بتابع صحيح بس هاتجاوبوا وهما عارفين نفسهم ماشي

مذاهب دكاترة الجامعة في وضع اسئلة الامتحانات

2009-04-15T14:11:00.000-07:00

ده بقي بمناسبة إني لسه خارجة من الإستمحانات وكل استمحانات وأنتم طيبين

نظر الاستاذ في عيون المحدقين به ثم قال

اعلموا يا أبنائي ان مذاهب فقهاء الجامعة في وضع الاسئلة كثيرة وان اشهرها سبعة، فثمة

المذهب التصفيري
وهو يركز على ان لا ينال الطالب اكثر منصفر في الامتحان

المذهب التشبيحي
على الطلاب .. ويثبت هذا المذهب ان الدكتور
فهمان وانه يستطيع ان يضع اسئلة صعبة

المذهب التعليمي
وهو المذهب الذي يتذكر فيه الدكتور جميعالامور التي نسي ان يشرحها خلال المحاضرة ثميضعها على شكل اسئلة تعليمية، يتعلمها الطلاب
خلال الامتحان وهو اكثر المذاهب المتبعة

المذهب التشكيكي
وهو المذهب الذي يجعل الطالب يشك في ورقةالامتحان التي بين يديه انها لمادة اخرى من
كلية اخرى وصلت اليه بالخطأ

المذهب الرياضي
وهو يركز على تنمية لياقة الطالب فيبدأالامتحان ويبدأ معه الطلاب بالركض بأقصى سرعةلإجابة أكبر عدد ممكن من الاسئلة وينتهيالوقت والطلاب يتصببون عرقا دون ان يقطعوا
نصف المسافة في الامتحان...

المذهب التخطيطي
وهو مذهب فني جمالي يركز على تحسين خطوطالطلاب وقدراتهم الكتابية عن طريق وضع اسئلةتكون اجوبتها جريدة فأكثر وأخيرا

المذهب الابهاري
وهو يهدف الى إبهار الطلاب وجعلهم يذهلونمن سعة بحر العلم وكم فيه من دقائق المعلوماتالتي لم يسمعوا بها قط......................
ترقبوا المذهب التحبيطي قريبا في الاسواق________________________________
الملحق:نوطة المذاهب الترسيبية :
المذهب الغباشي
تنظر إلى ورقة الامتحان فلا تعد ترىبعينيك سوى غباش .. غباش .. غباش ..
المذهب الجزري
من لا يدرس ينجح ومن يدرس يأخذ جزرة
المذهب التشابهي الجداري
أسئلة متشابهة تجعلك تفوت بالحيطمذهب ريّح بالك ولا تعزّب حالكشو ماعملت لح ترسوب
المذهب الوحدوي
سؤال واحد عليه كل العلامة وإنتى وحظك بقى
مذهب إبقا قابلني
أسئلة من خارج المنهاج ، جاوب وإبقاقابلني إذا بتنجح .
مذهب وما السائل بأعلم من المسؤل
أسئلة يضعها أبو صطيف الخضرجي جار الدكتوربالبناية وبيصلّحها أبو الليل اللحّام

منقول ..... مجموعة الوسائط العربية البريدية

هي دي أخرتها

2009-02-13T07:43:00.000-08:00

خلاص الواحد بقي يقعد يتفرج علي البرامج الحوارية وهو جنبية كوباية ميه وبورشام الضغط وجهاز قياس السكر وحتي لو الواحد حاول لا يشوف ولا يسمع ولا يقرا يلاقي واحد ابن حلال معاه في الشغل ولا مدونه صديقة تبقيك دائماً علي إطلاع
فقولت بقي مبدهاش اعرف من نفسي احسن اقوم الاقي ايه بقي برنامج 90 دقيقة بيتابع أزمة البحاريين المصريين المخطوفين علي السواحل الصوماليه وكانت قريبة بحار منهم بتقول أن الحكومة المصرية وعدتهم بحل الأزمة في ساعات وصاحب السفينة عرض دفع الفدية إية اللي مأخرهم 10 ايام والناس بتموت هناك وفي منهم مرضي والأكل خلص والميه علي وشك .
تيجي بقي المذيعة وتقول ان في حد من وزاره الخارجية هايرد وميرسي ليه علي سرعه إستجابتة وياريتة مفتح بقة اصلا
قال ايه مالك السفينة بعد ما دفع الفلوس حمرق واتشرط ومش عارفه ايه ومش هو ده كان إتفقنا الحكومة المصرية تتفاوض بس مش بتدفع فدية
رد مالك السفينة وقال انه فعلا دفع نص المبلغ والنص التاني سفينة تانية عرضها للرهن أو البيع وبناء علية استلمت الجهه اللي بتخلص الموضوع الفلوس كلها
يعيد بقي مندوب الخارجية ويقول وزارة المالية لا تقوم بدفع فدية للمخطوفين
يعني نفهم من الكلام دة أن لو صاحب السفينة وأهالي المخطوفين مش معاهم المبلغ كانوا اترموا ولا حد سأل والأنقح أن الفلوس موجودة والحكومة بتماطل
هي دي أخرة انك تكون مصري محدش بعد كدة بنتظر أننا تكون لينا قيمة في أي بلد حتي لو كانت واق الواق

ميلات الناس مش لعبة

2009-01-25T16:12:00.000-08:00

- اية ده يا وومن اهي طولة لسانك اللي عاوز قصة دي اللي هاتجيبك ورا
- لا دي مش طولة لسان لازم كل واحد يعرف حدودة هي ميلات الناس لعبة ولا لعبه ؟ ولا تكونشي لعبة
تدخل في هذوه اللحظة وومن العاقلة فيه ايه بس يا وومن منك ليها فهموني
- بصي يا سيتي مش انتي ساعات تفتحي الميل تلاقي ميل اياُ كان نوعة ( ديني ، ثقافي ، سياسي ، تحذيري ، معلوماتي ) وفي اخرة ابوس علي ايد اللي خلفك وحياة الغالين عندك وحياة الحيين والميتين تبعته لكل اللي عندك فيصعب عليكي وتبعتية
- اه بتحصل فين المشكلة بقي
- المشكلة اني بمسح الخمستلاف ميل اللي متسجلين علية قبل ما ابعتهم
- ماشي كتر خيرك
- لا بعدها بيومين بقي تلاقي ميل مش باينلة اصل من فصل طالب تسجيلك علي الماسينجر تقومي قابلاه
- وتقبلي ليه ؟
- علشان ممكن يكون حد من اصحابك وغير ميلة او حد من الشغل او مدون مثلا او لسبب تاني هاقولك علية
- اه
- تلاقية بقي واحد خفيف ظريف من اي حتة في الكرة الأرضية ولا لوش اي علاقة بيك اتبعتله الميل وقرا ميلك فسجلة وكأن الميلات الفوروارد دي بتدي للي بتروحلة حق مكتسب في انه يترازل علي خلق الله
- وبعدين
- حاجة من التلاتة لما تطلبي انه يحذف ميلك ويبقي حد مؤدب ويعتذر ويمسحة ( نادرة جداً ) ، او تشبطي في خناقة فيقول عليكي حد مش لطيف وشلق ويعملك اجنور ويسجلك بميل تاني زيادة في الرخامة ( بتحصل كتير ) لا اما مجرد ما تفهمية انه غلطان وان الميل له خصوصية ومش من حقة يحشر نفسة في حياتك من دون إستئذان ووقتها بينزل عليكي سيل من الشتايم وكأنك انت اللي غلطان – طبعاً بعد ما بيظن ان الميل دة راجل مش بنت وكرفه بعد ما عرف انه راجل زية –
بجد نفسي اعرف امتي هانتعلم نحترم خصوصية الناس التانين الميل دة برضة زي رقم التليفون أو عنوان البيت مش من حق اي حد يعرفة غير لما يستأذن أو يعاكس علية فعلا
يالههههههههههههههههههههههههههههههههوي

يا مهلبية ....يا

2009-01-08T08:19:00.000-08:00

لا أدري لما يتردد في ذاكرتي هذا الفيلم في ظل هذه الأحداث عندما كانت بطلة الفيلم وصاحبة الكبارية وهي مناضلة سياسية – لا أدري لما ركزت الدراما المصرية علي كراكتر الراقصة التي تمول العمليات الفدائية ويكون مرقصها واجهه للتمويه او ان الفدائيين كانوا يجتمعون في الملاهي الليلة والمراقص أيضاً للتموية – ويمر بها شاب يحمل صندوقاً للتبرعات وتسألة في سذاجة وفضول
- بتجمع تبرعات لمين ؟
- لفلسطين
- هي فلسطين دي اختك الصغيرة ؟
ويبدأ الشاب في شرح القضية التي تتحمس لها وبناء عليه تنتقل لمساندة فلسطين بدلاً من مصر التي خدعت من قبل بعض المدعون الذين اوهموها بانهم وطنين وتكون خطتها ببساطة في استغلال نفوذها لإرسالهم للقتال هناك في حرب 48 . والتي انتهت بالهزيمة
اتذكر هذا الفيلم الذي يندرج تحت نوع الفانتازيا كلما قدرت لي الأقدار بأن اقضي يوماً أخر في عملي وانا اكاد اميز من الغيظ من هؤلاء الغافلون الذين يقول لسان حالهم يا مهلبية يا ومازالوا بعفوية يتسائلون هي فلسطين دي اختك الصغيرة ؟؟؟؟!!!!!!!!!!

قال الست العاقلة قال !!!!!

2008-12-14T07:15:00.000-08:00

من اسخف الأشياء التي قرئتها " المرأة العاقلة تضع السكر في كل ماتقولة للرجل وتنزع الملح من كل ما يقوله لها "
طب وانا أيش ضمني انه من كتر أكل السكر نفسه متموعش ويقول نفسي في حاجة حرشة , ولا مثلا من كتر ما انا بشيل الملح يجيلي املاح وضغط وامراض الدنيا ويقولي بقيتي مش نافعه !!!!
واصلا اشمعني هو ياخد سكر علي طول وانا الملح مه شوية كدة وشوية كدة علشان يحصل توازن ولا ايه ؟
ملحوظة مهمة جداً
اللي كتب الجملة دي راجل هو في نظرة دي الست العاقلة ونفهم من كدة إيه ؟؟؟؟؟
مفيش فايدة في الرجالة

بمناسبه إني مصري ...مش هاشتري هه

2008-11-15T14:09:00.000-08:00

من كام يوم كده كنت بتفرج علي الإختراع اللي اسمة تفليزيون وتامر أمين قاعد قدامة واحد كدة شكله مش غريب عليا قاعد بيتكلم عن الأزمه العالميه وبجد كان شرحه هايل لدرجه اني صدقت انه كله تمام ومصر في السليم والدنيا هاتبقي بمبمي بمبي المهم علي اخر الحلقة كدة عرفت انه وزير الإستثمار محمود محي الدين
ايه ده هو غيروا الوزير وعملوا وزراة استثمار امتي ؟؟؟؟؟ البلد دي بيحصل فيها حاجات كتير من ورايا
المهم انهارده بقي بتفرج إجباري علي العاشرة مساءاً الاقي سيادته بيشرح حكاية الصكوك الجديدة دي وبيقول علي المواطن اللي هو احنا " انه هايحصل علي الصك بمناسبه انه مصري "
هع هع هع هع هع هع هع هع
هو في مناسبه علشان اخد حقي في البلد دي اول مره اعرف ان الحق ليه مناسبات وبمناسبه اني مصري مش هاشتري علي اعتبار اني من 41 مليون اللي ليهم حق الشرا وبرضة مش فاهمة ازاي الواحد يشتري حاجة ملكة اصلا ؟؟؟؟؟؟؟؟؟؟؟؟!!!!!!!!!!
يالههههههههههههههههههههههههههوي

المصريين اهمه ......... بجد

2008-11-11T03:56:00.000-08:00

بالرغم من ان المصري الأصيل هو صاحب المثل اللي بيقول " إدي العيش لخبازه ولو أكل نصه " إلا انه هو هو نفس المصري اللي بفهولته بيقول لنفسه " وياكل نصه ليه هو يعني هايعمل ايه مش هاعرف انا اعملة " وده بيخليني دايما اهرش في راسي واقول لنفسي الناس دي اللي هما احنا بيعملوا كده ليه ؟ وعلشان تفهموا قصدي ركزوا معايا
اول امبارح كنت قررت اشتري بريتنر علشان اترحم من اللف علي السيبرات وبعد التجول في النت لفتره والبحث والتمحيص واستشاره الإصدقاء قالولي
- ما إلك الا المول
المهم اتوكلت علي الله وروحت المول الي في شارع العريش في الهرم وطبعا لآني بحامي للطبقة العاملة من الشعب بستعمل وسائل تنقلهم اللي هي الميكروباز ......إحم احم
المهم اشتريت البرينتر ورحت لفحاها علي ايدي وروحت ادور علي ركوبة اروح بيها وانا بركب بقي خلوا بالكو كان في واحد صيني لا يتحدث العربية بيركب وعند سؤاله رايح فين قال بعربية ركيكة – يعني مش قد كده – آون طبعا مفيش في شارع الهرم اي مكان اسمه آون بس هو ركب وبعده اكتشفت ان كان في بنت في الكرسي اللي قدام بتتكلم صيني وهانك يا رغي مع الأخ ده بالصيني وكل شوية تشاور بما معناه علي طول – طب شمال – وقف هنا
وفهمت السواق ان الصيني عارف المكان وهايقول ( ألا جنب ) لما يجي ينزل
- لحد كدة مفيش مشكلة وحاجة تفرح بس كان في ملحوظه مهمة ان الولد الصيني دفع ( امسين ) يعني خمسين قرش والأجرة جنية ودة معناه انه نازل قريب.
- مركزين معايا المهم فضلت حصة الصيني شغاله لحد ما البنت نزلت واحنا قربنا نوصل وعم الصيني مش لاقي ( الأون ) اللي هو بيقول عليها
- وهنا بقي كان لازم اتدخل لآنه كان ابتدي يعمل قلق للركاب والسواق فسألته بالعنجليزي
- انت بتتكلم عنجليزي ؟
- اه
- طب انت عاوز تروح فين
- أون
- مفيش مكان اسمه اون هنا ممكن توصفه
- في جنبية مطعم
- طيب ده معناه انك عديت علية من هنا لآخر الطريق مفيش مطاعم ( ارتبك جداً وغالبا كان بيفكر يرمي نفسه من الميكروباز )
- اهدي بس هو المطعم اسمه ايه
- تكا
- تكا !!!! انت عاوز تروح التعاااااااااون
طبعا كل الركاب أول ما سمعوا تكا فهموا هو عاوز يروح فين فاتفقنا مع السواق انه ياخده وهو راجع وينزله عند تكا وهنا كنا وصلنا للمحطة وانا فهمت الصيني انه هايرجع مع السواق
الحاجة اللي تغيظ بجد ان البنت طول الطريق بتستعرض علينا بالصيني مع انه بيتكلم انجليزي
ثانياً بقي توهت الولد وضيعت وقت طويل علشان يرجع وبرغم من الحديث الصيني اللي استمر اكتر من 20 دقيقة ولا مره فكرت تسأله عن علامة الطريق مع انه معروف ان كل محطات شارع الهرم الرئيسية متعلمه بمطعم او بنزينة او محل ملابس او مول مشهور !!!!!!
نستفيد من الموقف ده ايه ؟
انك متسألش مصري ابدا عن عنوان حتي لو كان بيتكلم صيني

يالههههههههههههههههههههههههههوي

علشان اللي فاهمين غلط

2008-11-07T02:43:00.000-08:00

تعليق غريب جداً وصلي من حد اسمه Pink علي موضوع الحجاب وتعليقة كالآتي :-
تدافعين عن الحجاب و تضعين صورة مدونتك لفتاة غير محجبة ؟؟؟؟؟؟؟
ورداً علي الأخ أو الأخت pink اللي الواضح منه انه بيحاول يقولي اني متناقضة !!!!!
اولاً : دي مش صورة لو كبرتها هاتلاقيها صورة بورترية بالزيت والبنت فيها لابسة ملابس النوم مش منطقي ابداً اني اقول ان في واحدة بتصحي من النوم محجبة – دة بيحصل في المسلسلات العربي بس -
ثانياً : اللوحة لرسام إيراني ويعد حاليا واحد من اشهر الرسامين في العالم
ثالثا: البنت اللي في الصورة محتشمة جداً ومش باين غير شعرها
رابعاً بقي ودة الأهم اني لما هدافع عن حجابي او عن الحجاب عموماً مش معناه إني ههاجم غير المحجبات وأقول انهم وحشين.
لأن لو حضرتك - سواء كنت ولد ولا بنت – متابع لقضية الحجاب هتجد ان هناك مدافعين عنه من غير المسلمين اساساً علي اعتبار ان اختيار الملبس حق من حقوق الإنسان ويندرج تحت بند حريتة الشخصية بعيداً عن الجدل الديني من وجهه نظرهم.
وبمناسبة الحرية الشخصية انا ليا مطلق الحرية في اختيار صورة مدونتي طالما انها لا تجرح شعورك او حياءك.

علي الهامش
انا رديت علي التعليق في بوست لآني شوفته متاخر جدا ومش فاهمة في بعديه بوستين اشمعني ده اللي بيتعلق علية بالجملة دي مفيش حاجة في المدونة كلها لفتت نظرك غير الصورة ؟!!!!!!!!!!!!!!!!

يا حلو بانت لبتك

2008-09-19T05:48:00.000-07:00

كل سنة وانتم طيبين . كل سنة وانتم مدونين
طبعا الجو الرمضاني دة مش مساعد علي الإصتباحة خالص الواحد بيعملها في السحور مش عارفة كدة بقي اتقلبت تمسية ولا ايه ؟ هابقي أسأل في الموضوع ده
المهم بقي ان في الجو الرمضاني الجميل دة وفي أحد الليالي اللي مكنتش عاملة حسابها النت فصل وأعلن عصيانة قولت زي بعضة اروح اتهطل شوية واتفرج علي التليفزيون واهو بالمرة اخد فكرة علي المسلسلات اللي بيعذبوا بيها المشاهدين واهو كل شيل ذنوب ودة شهر مغفرة وكدة

بقلب كدة في القنوات لقيت ملسلس بطولة ممدوح عبد العليم – مع ملاحظة اني مش متابعه الملسلس – حصل ايه بقي في الحلقة اليتمية اللي اتفرجت عليها .

علي حسب ما فهمت ان ممدوح ( أسمة كدة برضة في العمل اللي ملوش علاقة بالدراما خالص ) رجل اعمال وقلبة حنين وعطوف قوي عطف علي البت البياعة السريحة وادالها عشراية كبيرة ( 100 جنية يعني ) وباقي الآكل الفايف استار علشان ابوها العيان ولما البلطجي اللي مسرحها حب يقلبها – خدوا بالكم معايا- وقف البودي جارد بتوعة يتفرجوا وضرب هو البلطجي وجون وجون وجون .

طبعا اخدله دعوتين حلوين من البت السريحة من عينة إلهي يسترك مايفضحك , إلهي يعمر بيتك والحركات دي المهم بقي علشان كمالة الشهامة بعت جاب ابوها العيان وعشاهم في القصر بتاعة وادلها بتاع بكوين كدة لزوم علاج الراجل ابوها.

نفهم من ده أيه بقي ان دوحة رجل الأعمال الشهير الفظيع شهم وكريم وقلبة حونين علي الغلابة ماشي هانعديها

بعد شوية بقي الباشا في مكتبة مع دراعة اليمين وبيناقشوا افتتاح الخط الملاحي- يعني مراكب وعبارات وكدة - وبلغة الأمر دليل الشخصية والنفوذ الكاراكتر المعتاد بتاع اي رجل اعمال : لازم الخط دة يشتغل في اسرع وقت ويمسك موبايله – اللي هو موديل سنتين فاتو – ويتصل بأحد خصومة وهاتك يا تهديد ووعيد .

نفهم من دة اية ان عمو الشهم له اعداء كتير كتير وركزوا معايا الجاي مهم

يتضح بقي ايه ان واحدة من أعداء عمو الشهم اكتشفت ان عنده مخالفات فزيعة فزيعة – مركزين معايا –

هنا بقي ربنا رحمني برحمتة وخلصت الحلقة وانا بقول يا حلو بانت لبتك يعني السنة اللي فاتت تطلع علينا بمسلسل بطلة ظابط شرطة بيخرج في قضية تعذيب ويدور علي براءتة لحد ما يثبتها والسنة دي رجل اعمال عنده خط ملاحي وعبارات وفي ذات نفس الوقت طيب وكريم وشهم وميعرفش حاجة عن المخالفات الفزيعة دي ولو اتفرجت علي أخر حلقة هالاقية برضة اثبت براءتة

طب حضرة المؤلف والمخرج والممثلين عاوزينا نفهم من كدة ايه ان كل كارثة بيعملها رجل اعمال مثلا مش مسئوليتة لأنة شوال فلوس وبس ومش مسئول عن الناس الوحشة اللي مش عندها ضمير اللي بيشتغلوا معاه – الكلام ده سمعته فين قبل كدة فين أفتكروا معايا كدة

يالهوووووووووووووووووووووووووووووووووووووي

رمضان كريم لدرجة الغيظ

2008-08-19T17:39:00.000-07:00

يا فتاح ياعليم يارزاق ياكريم ( دعاء الإصتباحة ويارب اكفينا شر الغيظ وفقع المرارة ) نفتتح اليوم واروح شغلي اللي بيتصادف انه في أحد الإحياء السوبر هاي رايحة في أمانة الله اركب الإستخراع اللي اسمة سانسير الاقي ايه بقي خير الله اما جعله خير ورقة متعلقة كلها بالعنجليزي انا استغربت قوي عادة إدارة العمارة بتكتب الإعلانات باللغتين نظراً لآن سكان العمارة من جنسيات مختلفة .
- طب ما تقري يا وومن كدة
- يالهوي عليكي مبتفوتيش خالص حاضر هاقرا
- ليدز اند جيركن من امممممممممممممممممممم
- وات ايز زيز
- هه
- ايه ده واحد من سكان العمارة طالب في إحدي الجامعات الأجنبية عامل إعلان طويل عريض علشان هايعملوا شنطة رمضان للفقرا وكاتب في الأخر ان تكلفة الشنطة 650 جنية مصري
- كااااااااااام
طبعا خلعت نضارة الشمس وبربشت بعنيا علشان أتأكد ان العدسات جواهم ومش محتاجة النضارة – انا بشوف كويس من غير الإتنين – واتضح اني قريت الرقم صح
السانسير وصل وانا في الطريق للشركة قاعدت افكر شنطة رمضان اللي تكلفتها بتساوي 3 أضعاف متوسط دخل أي اسرة فيهم هايبقي فيها ايه ؟
يمكن الفسدق الإيراني اللي امريكا حذرت إسرائيل من شراءه وهما عاوزين يدعموا الإقتصاد الإيراني غيظاً في امريكا؟
يمكن المكرونة اللي بدقيق السميد والفيتامينات علشان الرجيم نظراً لآن الطبقة دي بتعاني احياناً كثيره من السمنة وسوء التغذية نتيجة الإعتماد علي النشويات في الأكل دون اللحوم ؟
يمكن السمن المستورد الفاخر اللي الكيلو منة بتمن 2 كيلو لحمة لآنة صحي ومش زيت مهدرج أعيد تصنيعة ؟
يمكن قمر الدين والمشمشية والقراسيا السوري علشان تدعيم العلاقات مع الشقيقة سوريا ؟
طب مهو لما ابقي انا اصلا حد فقير ومش عارف الحاجات دي ايه ولا طعمها ايه ولا قيمتها حاجة من الأتنين لا هاتعجبني واحقد علي الغني اللي عايم في الحاجات دي , لا مش هاتعجبني وهارميها واعتبر انه جابلي حاجات بايظة وحمضانة واتمنظر عليا

هو بجد في ايه ؟ حتي عمل الخير بقي الغرض منة المنظرة وخلاص بغض النظر هو لمين ولا لفين .
حتي لو مش منظرة للدرجة دي في ناس مش حاسة بالبلد مش عارفة ان الـ 650 جنية دول = 15 شنطة بتغطي احتياجات اسرة فقيرة لمدة اسبوعين يعني 15 أسره
يالههههههههههههههههههههوي

2008-08-07T06:02:00.000-07:00

أحبتي في الله
يعلم الله كم احببتكم كيف كان لكم بالغ الآثر علي حياتي
ولكني ولآسباب خاصة سابتعد لفترة لا يعلمها إلا الله فلا تقلقوا فأنا بخير حال وصحة والحمد لله لكني اريد ان أختلي بنفسي لآعيد حساباتي في بعض من أموري
سأفتقدكم بشدة لكني أعلم أن دعواتكم سترافقني حتي أعود

ايوة محجبة طب وانتم مالكم

2008-07-29T16:25:00.000-07:00

مش عارفة جرعة النكد اللي كل يوم بتذيد دي هاتنقشع امتي بس بجملة كل شوية اتكعبل في مدونة بتشتم في الحجاب والنقاب وما بينهما وبهوذه المناسبة في سؤال بيزن ويعن علي راسي لكل الناس اللي بتعارض الحجاب هو احنا في مصر خلعنا الحجاب امتي ؟ في أوائل العشرينيات ورجعناله أمتي في اواخر التمنينات ؟ يعني اكتر من 50 سنه بدون حجاب السؤال بقي أذكر اهم الإنجازات التي حققتها مصر بدون حجاب ؟؟؟؟؟
يعني بتحسسوني ان مصر كانت علي وشك ان تصبح قوي عظمي وجه الحجاب هو اللي رجعها لورا مش عاوزه واحد يتفلحس ويقولي حرب 73 هارد علية وقولة ووكسة 67 مش محسوبة ولا ايه .
وليه مثلا مش ماسكين بلد زي إيران الستات بتححجب فيها بالآمر واخدين بالكم من بالأمر دي ومع ذلك دة ممنعهاش انها تتطور برنامجها النووي وتقف لآمريكا زي العضمة في الزور ولا ايه ؟
وبرضة الكلام لآي واحدة بتعارض الحجاب واي واحد بيعارض الحجاب خلاص يا ستي متحجبيش وانت كمان متحجبش والدتك ولا اختك ولا زوجتك ولا بنتك بس لو فيها رخامة ممكن حضرتك متلبسيش حجاب وانتي بتصلي ممكن حضرتك تقول لولدتك واختك وبنتك ومراتك صلوا من غير حجاب وشوف كدة هاتقدري ولا هاتقدر ولا وانت بتعمل عمرة قول لأهل بيتك متلبسوش لبس العمرة هانعمل العمرة كاجوال قميص وبنطلون وياست الحبايب وانتي بتحجي متلبسيش لبس الإحرام اه انا رافض الحجاب يبقي في كلة
هاتقدر تعمل كدة , هاتقدري تعملي كدة حد فيكم هايتفلحس ويقولي أن الصلاة من غير ستر كل البدن للبنت والسيدة صحيحة حد فيكم يقولي ان ممكن اعمل عمرة او حج وانا من غير حجاب .
مش فاهمة ماسكين في الحجاب والنقاب ليه يعني انا مثلا حجابي دة ممنعيش عن اي حاجة سوقت عجل وانا طفلة وبعدها اتعلمت اسوق موتسيكلات وانا محجبة عادي والدي كان بيحب يسوق الموتوسيكلات وبتعلم اسوق العربية صحيح كسرت عربيتين ومتعلمتش بس برضة هاتعلم وانا محجبة
مش فاهمه الحجاب هايمنعني عن ايه ابويا اللي حجبني ده هو نفسة اللي دخلني الجامعه هو نفسة اللي اشترالي اول كمبيوتر ودفعلي مصاريف اول كورس وهو نفسة اللي سابني اقرا كتب واروح معارض فنية واروح الآوبرا ابويا اللي حجبني ده هو نفسة اللي فرجني الأهرامات والقلعة هو اللي وداني اصلي في الحسين واتسحر في رمضان هناك هو نفسة اللي كان بيوديني كل المازارت السياحية علشات اختلط بالأجانب واتكلم معاهم وامارس اللغة واعرف الناس دي بتفكر ازاي ابويا اللي حجبني هو اللي دخلني مدارس اللغات اللي بتعلم الدين وتحفظ قرآن في نفس الوقت ابويا اللي حجبني ده هو اللي كان بيدخلني السينما والمسرح ويعلمني اركب خيل زية زي ابو داليا ومروة وشيرويت ورشا وغادة ونعمة وناهد ودعاء وهبه وناريمان صحباتي البنات من ثانوي والجامعة واللي مفرقوش عني كتير ابويا زي خالي وعمي وجوز عمتي وجوز خالتي حجبونا اه لكن نورلنا عقولنا
افهم بقي حجابي رد حضارة حضراتكم في ايه ؟ طب حد منكم ينكر ان المسلمين الأوائل بنوا حضارة واخدين بالكم حضارة ووضعوا اسس وقواعد لآكتشافات وعلوم وحكموا كقوة عظمي لآكتر من 300 سنه والثابت تاريخيا أن نساء هذا العصر كن محجبات والنبي عاوزة حد يقولي محصلش
حجابي ولا نقابي هايمنعني من ايه ؟
اني اشتغل رقاصة مثلا بجملة مصر البلد التي يروج لها سياحياً ببدل الرقص هاتنقص واحدة.
هايمنعني اني اشتغل مذيعة في التلفزيون الحكومي أحسن الفضائيات علي قفا من يشيل وصاحب الموهبة الحقيقية الأبواب مفتوحه ليه .
هايمنعني اشتغل في شركة متعدده الجنسيات بركة ياجامع انا ارفض اني اكون فترينة عرض رخيصة علشان الهي الزبون ويطلع بالمطلوب .
هايمنعني اشتغل مضيفة طيران في شركة مصرية بناقص شركات طيران خليجية بتشترط الحجاب اصلا .
هايمنعني اخد حمام شمس علي البلاج طظ في شواطيء للمحجبات اخد راحتي فيها واعوم اه بعرف اعوم وبرضة ابويا هو اللي دفع حق دروس السباحه
في الآخر برضة بأكد علي حريتي وحطلي خط أحمر تحت حريتي دي وبعيداً عن الجدل الفقهي في اني أرتدي ما أريد كيفما أريد محجبة نعم مرتدة حضارياً لا .

يالهوووووووووووووووووووووووووي

النضافه من ..............

2008-06-23T08:39:00.000-07:00

انهاردة كالعادة خرجت من البيت علشان اروح الشغل وقولت دعاء الأصتباحة وكلة تمام ووقفت علشان اركب ميكروباز اصل انا مقاطعة التك توك
لفت انتباهي ان في حاجة غريبة ايه هي مش عارفة بس الشارع شكله مش طبيعي
- يمكن يا وومن علشان خارجة بدري ولسه البياعين مجوش
- مجوش ايه يابنتي دول تقريبا بياتوا هنا اشمعني انهاردة الشارع فاضي ؟
وبعدين الشارع برضة في حاجة غريبة يا تري يا هل تري ايه هي ؟ ربنا بقي اراد إني مقعدتش اضرب أخماس في اسداد كتير اتلفت يميني كده اشوف أي ميكروباز جي الاقي ايه من بعيد خير الله اما جعله خير يارب عمال بتوع هيئة النضافة والتجميل عمالين كنس وتنضيف في الشارع
- بس هي دي اه الشارع انهاردة نضيييييييييف جدا
- غريبة انهاردة الخميس ويوم السوق كان التلات يعني المفروض الشارع يتنضف يوم الأربع طب هما فعلا ادوله وش نضافة يوم الأربع بيلمعوا فيه انهاردة لية ؟
كان ساعتها الميكروباز جه نطيت فيه وقعدت في مكاني المفضل جنب الشوباك كل ما اعدي علي شارع الاقيهم شغالين علي قدم وساق ودراع كمان تنضيف وكنس ولم زباله حاجة غريبة
لما روحت الشغل اتصلت بابتي ( بابا ) حبيبي علشان اسأله وقالي
- اصل فلان الفلاني ( شخصية مهمة ) جي انهاردة يشوفهم عملوا ايه في الجامع
- الجامع اللي بقالهم 3 سنين بيبنوه ده
- اه
- اللي تبع وزراة الأوقاف ده
- ايوة
- اللي بانين حوالين بقيت الأرض يتاعتة سور وكاتبين عليها ممنوع إلقاء الزبالة بجوار السور الزبالة مكانها الصناديق يا بني آدمين ومفيش اصلا صناديق ده
- هو بعينة
- لا يا بناتي معرفوش , عموما تشكر يا عم الحاج سلام بقي علشان انت عارف السبوبة ليها أحكام
حاجة غريبة بجد يعني هو الشارع لازم يفضل معفن والزبالة متكومة فيه ومنطقة بحالها مفيهاش صندوق واحد ولا بيعدي فيها كناس لله غير لما حد مهم يعدي وبعدين يرجعوا يقولوا أننا شعب همجي ومش نضيف ومش عارف ايه طب انا مرة جيت ارمي علبة كانز في صندوق لقيتهم سايبينوه مفتوح من تحت واللي بيرمي فيه حاجة بتقع في الشارع علشان المحافظة بتاعتنا شعارها الجيزة مدينة نظيفة فيبقي في صناديق بس ملهاش لازمة
يالهووووووووووووووووووووووووي

بطلت أتغاظ لا مبطلتش

2008-06-17T09:03:00.000-07:00

قاعدة كدة مع نفسي وبفنكر وإذ فجأتن كدة افتكر ان في ناس بتسألني مش بتكتبي حاجات تغيظ ليه ؟
صحيح يا بت يا وومن مش بتكتبي ليه تكونيش بتطلتي تتغاظي
- ممكن
- مش فاهماكي يعني بقي مفيش حاجة بقت بتغيظ خلاص العيشة بقيت فل الفل والأسعار نزلت والحكومة اتغيرت والرجالة ربنا هداهم وبطلوا تحرش ومعاكسة والبنات عقلت وبقت تراعي ظروف الشباب وبطلوا هيافة وو ..................
- اااااااااااااااه مرارتي
- مالك ياوومن
- اعراض غيظ جي في الطريق
- يعنى هاترجعي تتغاظي
- يابنتي هو انا اصلا بطلت اتغاظ علي رأي ناس اعرفهم دي بقت عيشة تشيب الأقرع .
يالهوووووووووووووووي
ملحوظة
دي بس مناقشة صغيرة بيني وبين نفسي وان شاء الله هابقي اغيظكم معايا وكل واحد يجيب مرارة احتياطي

قال مكبوتين قال

2008-05-11T01:42:00.000-07:00

يا فتاح يا عليم يارزاق يا كريم ( دعاء الإصتباحة بتاع كل يوم )
فتحت المازينجر بتاعي علشان اشوف اخبار الدنيا - عادي يعني بتحصل - وطبعا نظرا لشهرتي الفظيعة وشعبيتي الجامدة بلاقي عندي كل يوم اوف لاين ماسيج بالكوم
- ايه ده لينكات كويس هانسطبح هانسطبح يعنى وهي فرصة ابقي اول تعليق ( بموت في اول تعليق دة بيبقي طازة بنار الفرن )
فقع مرارة يا ساتر ياتري مين اللي مفقوع مراراته علي الصبح
- ادخل يا بت ياوومن
- لا متخدليش انتي لسة مغيرة مراراة من قريب لو الموضوع يغيظ بجد كدة حتاجي نقل مرارة مطاط مش كل يومين تغير واحدة
- لا ادخل بس سمي الأول
اقوم لاقي ايه بقي موضوع صحفي عن المدونات البنات - هيه هيه - بيتكلموا عننا والله جميل قوي اقري بقي وسمعيني يا بت يا وومن والله كلام جميل وناس موضوعية و ...........
- ايه ده ايه ده هما مين دول المكبوتين المدونات ؟؟؟؟؟؟؟؟؟!!!!!!
- لا مش انتي بيقول علي بتوع الأقاليم
- ياسلام يا ختي يعني هو شكر في سكان العاصمة مه كان ناقص يقول ان كتاباتنا ناقصة ملح وطاشتها مش شاهقين عليها وساقطة في الحلة
بس بعد تفكير من معميق معميقي احساسي قالي انه يقصد بالكلام دة حد معين بيبعبر عن الكبت بتاعه علي طريقة للكبار فقط جايز برضة وحب يعنى يداري الموضوع فخبط في الكل او يمكن هو اصلا مش بيقرا مدونات البنات ومحبش يكسف نفسه ممكن او يمكن محدش قالة ان في مدونات بنات وصلت بالكبت بتاعها اللي مش عاجبة ده للعالمية معقول برضة
عموما ياوومن مكبتوين مكبوتين محدش له دعوه برضة هانبعبر بطريقتنا وحتي لو بنكتب في الكوسة والمحشي علي اساس انهم أدب احسن من اللي بيكتب في قلة الأدب أو علي طريقة خالف تعرف .
يالههههههههههههههههههههههههههههوي

ملحوظة :-

البوست ده ردا علي ما صرح به أحد المدونين في مجلة الوسط الكويتية عن رايه في المدونات واللي عاوز يعرف التفاصيل يقراها علي مدونه كوكب آبي

http://appyplant.blogspot.com/2008/05/blog-post_11.html

لا بجد .... هو في ايه ؟

2008-04-28T07:25:00.000-07:00

يا فتاح يا عليم يارزاق ياكريم ( دعاء الإصتباحة علشان اليوم كدة يعدي علي خير )
تاني يوم بعد الإضراب اللي ارضي جميع الأطراف وبعد أحداث المحلة اللي محدش فاهم هي ازاي وليه بدأت توصلني أوف لاين ماسيج وايميلات ورسايل علي الفيس بوك
- يالهوي ........ ياخرابي ...........الحقوا ياناس إسراء اتقبض عليها
- مين إسراء دي يابشر !!!!؟؟؟؟؟
- اه يا حبيبيتي ...........اه يا صغيرة يا اختي ........
- يا جماعه اهدوا حد يفهمني مين الأخت إسراء
ووسط مقالات الشجب ورسايل التنديد وجروبات الفيس بوك ابتديت اجمع الموضوع واتعرفت علي الأخت إسراء وطبعا دخلت في حالة إكتئاب وكلنا من غير مناسبة افتكرنا سعاد حسني في فيلم الكرنك
وماما في البيت تحلفني ميه يمين مليش دعوة بالسياسة " اديكي شايفة عملوا ايه في إسراء "
ومقالات وجروبات ودعوات للإعتصامات وكلنا مع إسراء وأخبار علي النت في كل حتة وإسراء اتخطفت يارجالة ........... ومش هانسكت وهانعمل وهانسوي وترتفع المشاعر وحالة الغليان واخيرا إسراء حالتها الصحية تسوء نتيجة سجنها مع المجرمين في سجن القناطر و ..................
- تم الإفراج عن إسراء وحالتها الصحية جيدة جدا " يا جماعه انا كنت باكل احسن اكل وبتعامل احسن معاملة " !!!!!!!!!!!؟؟؟؟؟؟؟؟
طشششششششششششششششششششششششششش
دة صوت كل المصريين اللي كانوا متابعين القضية اللي كل واحد فيهم حس احساس الفحمة وهما بيطفوها بمية متلجة
ووسط كل ده قعدت مع نفسي شوية علشان استوعب هو ايه اللي حصل الناس هي اللي كبرت الموضوع ولا الموضوع كان كبير اصلا وحصل فيه لعب ولا احنا اللي فهمين غلط ولا ..... ولا
يالهووووووووووووووووووووووووووووووووووووووي

ملحوظة :

هذه التدوينة ليس المقصود منها شخص بعينة او الهجوم علي اخد او التقليل من مجهود احد لكنها مجرد تسجيل لحالة مررنا بها جميعا

لا لغه تانية ............ولا تالتة

2008-04-12T07:22:00.000-07:00

المكان : منزلنا العامر
قاعدة انا علي الكمبيوتر بتاعي ومع نفسي والمزغودة (1) اختى والمزغودة (2) بنت عمتي قاعدين في الأوضة بينموا علي صحباتهم وعلي الممثلين واخر موضه ........من الآخر كلام بنات يعنى مليش فيه
مزغودة 1بصوت عالي : ايه لا طبعا
ياخبر خناقة الحق اخدلي ساتر – طبعا معروف ان خناقات البنات فيها شد شعر وتقطيع هدوم وبونيات والمتهور اللي يفكر يخلص بيقي اكيد انتحاري -
- وومن يا وومن
بتنادي عليا استخبي فين فين – ملحقتش افكر ولقيتهم فوق دماغي تماسكت وعملت نفسي كنت بيجب حاجة من تحت المكتب
- خير يا مزغودة منك ليها
مزغودة 1 : مزغودة 2 قال بتقول قال ان الأجانب بيخدوا في المدارس عربي زي ما احنا بناخد انجليزي
انا وفي حالة صدمة : نعم , هو انتي في سنه كام دلوقتي يا مزغودة 2
- في 3 ثانوي ياوومن
- ماشاء الله يعنى مش في 6 إبتدائي !!!! , شوفي يا مزغودة منك ليها احنا ليه اللغه التانية عندنا هنا هي الإنجليزي ؟
مزغودة 1 : علشان هي اكتر اللغات الحية انتشار علي الكرة الأرضية
الله اكبر ايه الحلاوة دي البت طمرت فيها العشرة وابتدت تشغل مخها الحمد لله الأ مل في ربنا كبير
شوفي يا مزغودة 2 اولا لازم تعرفي مين هما الأجانب اللي بتقولي عليهم دول يعنى هما مش لكشة واحدة كدة ولا شوية ناس اللي هما الناس التانين وخلاص
مزغودة 2 وهي مستغربة : يعني ايه
- يعنى الأجانب دول في منهم الأمريكان وفي منهم دول الأتحاد الأوربي وفي منهم الكتله الشرقية اللي كانت الأتحاد السوفيتي وحاليا روسيا ودول البلقان وفي دول شرق آسيا
- ايه ده يعنى مش احنا بس الشرقيين
- لا لو بصتي علي الخريطة في كتاب الجغرافيا هتلاقي ان في بلاد تانية موقعها الشرق برضة (الصبر يارب)
- لو الأجانب دول امريكان يبقوا مش هايتعلموا عربي لغة تانية هايتعملوا فرنساوى او الماني لأن دول اللغات اللي بعد الإنجليزي نفس الشئ للبريطانين ولو كنا بنتكلم علي فرنسا هايبقوا بياخدوا انجليزي ولو باقي دول الأتحاد الأوربي كل بلد فيهم بتتكلم لغه ونفس الشئ لروسيا ودول البلقان ودول شرق اسيا يعنى برضة اللغه التانية هي الإنجليزي زينا لأنها مش لغتهم الأم
مزغودة 2 : اه . طب هما ليه مبيتعلموش عربي
- ده علي اساس ان في 21 بلد علي الخريطة العربي لغتها الأم وده تقريبا اكبر عدد من الدول بيتكلم لغه واحدة ممكن الأستفتاء اللي اتعمل من مده في امريكا عن اهم اللغات اللي الشعب الأمريكاني يحب يتعلمها واللي كانت نتيجتها انها الصيني لأن الصين هي القوة الأقتصادية القادمة يجاوب علي السؤال ده
ممكن بقي دلوقتي حد يفهمنى ازاي بنت عمرها 16 سنه في سنه 2008 وفي 3 ثانوي عايشة بالتصور الساذج ده سؤال لوزراة التربية والتعليم ؟
يالهووووووووووووووووووووووي

المترو

2008-04-10T06:39:00.000-07:00

المكان : محطة المترو أول الخط - عربة سيدات
واحد قاعد في العربية بتاعه السيدات وواخد راحته المترو يقف تهجم البنات كلها يتعدل ويبص يمينة وشماله في رعب
- هوانا راكب غلط ولا حاجة
اهز راسي بالموافقة علشان اقصر وبقول في سري راجل محترم والله مش زي الباقين
- هي العربية دي سيدات فقط
اهز راسي بابتسامة ودودة فيقلب وشه في تعبير عن الضيق
- طبعا ربنا يخليلكم سوزان مبارك وحقوق المرأة
مرضيتش علية علشان مش بحب اتكلم في السياسه الصبح ومش عارفة ايه العلاقة بين سوزان مبارك وحقوق المرأة وعربية السيدات واحده من الركاب أطوعت وقالت له انزل المحطة الجاية واخد العربية المشتركة احسن تدفع غرامة أول ما سمع الغرامة قام في استسلام - شكلة كان هايعمل عبيط - ومشي ناحية عربية السيدات التانية هنا بقي كان لازم اتدخل
- حضرتك دي عربية سيدات برضة عربية الرجالة الناحية التانية
بصلي في غضب وقال وهو بيشخط
- لا بقي انتم كدا عاوزين تخدوا البلد كلها مش كفاية اللي خدتوه
كان المترو وصل المحطة ونزل وهو لسه بيبرطم بالكلام دة
المترو ده اليابان هي اللي جت وعملته وهي اللي حددت عربيات السيدات دي يعنى اليابانيين اللي معظمهم ملهمش ديانه مقدرين خصوصية البنات والسيدات وبيحترموها وإحنا اللي المفروض شعب متدين وأخلاق وشهامة ورجولة و........ و..............و.......... بنبصلها علي انها تفرقة عنصرية وان الستات مستقوية القلب
يالهووووووووووووووووووي

البنت الجميلة

2008-04-09T15:27:00.000-07:00

المكان :مكتب في احد الشركات في حي راقي

- صباح الخير يا وومن
- صباح الخير يا جميل
- بتعملي ايه ياوومن
- بكتب في المدونة بتاعتي
- يعني ايه مدونة ؟
- دي مساحة إليكترونية علشان الواحد يعبر عن نفسه و
- طب انا هاروح اظبط الطرحة
بعد يومين
- بقولك يا ومن
- ايوة يا جميل
- انا عاوزة اعمل مدونة
- هي بقت حلوة المدونات دلوقتي
- اصل انا قريت علي موقع ......... للتجميل وتخرج ورقة من جيبها وتقرالي " البنت الجميلة لازم يبقي عندها مدونة تكتب فيها يومياتها "
يعنى الأمورة عاوزة تعمل مدونة علشان حسب موقع التجميل تبقي بنت جميلة
يالهوووووووووووووي