ميرا ( وومن )

يا فتاح يا عليم يارزاق يا كريم ( دعاء الإصتباحة بتاع كل يوم )
فتحت المازينجر بتاعي علشان اشوف اخبار الدنيا - عادي يعني بتحصل - وطبعا نظرا لشهرتي الفظيعة وشعبيتي الجامدة بلاقي عندي كل يوم اوف لاين ماسيج بالكوم
- ايه ده لينكات كويس هانسطبح هانسطبح يعنى وهي فرصة ابقي اول تعليق ( بموت في اول تعليق دة بيبقي طازة بنار الفرن )
فقع مرارة يا ساتر ياتري مين اللي مفقوع مراراته علي الصبح
- ادخل يا بت ياوومن
- لا متخدليش انتي لسة مغيرة مراراة من قريب لو الموضوع يغيظ بجد كدة حتاجي نقل مرارة مطاط مش كل يومين تغير واحدة
- لا ادخل بس سمي الأول
اقوم لاقي ايه بقي موضوع صحفي عن المدونات البنات - هيه هيه - بيتكلموا عننا والله جميل قوي اقري بقي وسمعيني يا بت يا وومن والله كلام جميل وناس موضوعية و ...........
- ايه ده ايه ده هما مين دول المكبوتين المدونات ؟؟؟؟؟؟؟؟؟!!!!!!
- لا مش انتي بيقول علي بتوع الأقاليم
- ياسلام يا ختي يعني هو شكر في سكان العاصمة مه كان ناقص يقول ان كتاباتنا ناقصة ملح وطاشتها مش شاهقين عليها وساقطة في الحلة
بس بعد تفكير من معميق معميقي احساسي قالي انه يقصد بالكلام دة حد معين بيبعبر عن الكبت بتاعه علي طريقة للكبار فقط جايز برضة وحب يعنى يداري الموضوع فخبط في الكل او يمكن هو اصلا مش بيقرا مدونات البنات ومحبش يكسف نفسه ممكن او يمكن محدش قالة ان في مدونات بنات وصلت بالكبت بتاعها اللي مش عاجبة ده للعالمية معقول برضة
عموما ياوومن مكبتوين مكبوتين محدش له دعوه برضة هانبعبر بطريقتنا وحتي لو بنكتب في الكوسة والمحشي علي اساس انهم أدب احسن من اللي بيكتب في قلة الأدب أو علي طريقة خالف تعرف .
يالههههههههههههههههههههههههههههوي

ملحوظة :-

البوست ده ردا علي ما صرح به أحد المدونين في مجلة الوسط الكويتية عن رايه في المدونات واللي عاوز يعرف التفاصيل يقراها علي مدونه كوكب آبي

http://appyplant.blogspot.com/2008/05/blog-post_11.html

25 Responses
  1. Empress appy Says:

    ايووووون انتم مكبتوين ههههههههههههههه يا بنتى لما يبقى الانتقاد بموضوعيه ابقى معاه المشكله انى حسه انه نقد اتنين بس انا ونوارة ومش فاهمه ليه عاملين له حساسيه ولا ايه
    والله بما انى مش من الاقاليم ياااااااى بس زعلت ودمى اتحرق حسيت انه مستهون بينا
    يالا ثقافات يا قمر


  2. وايه المشكله ان الواحد يطلع كابته فى المدونه مش احسن لما يطلع في حد فى او يطلع في حاجه مش كويسه


    بس المفروض اللى يتلكم يوضح يقصد ايه بالكبت

    يعنى انا مضايق وزعلان من موقف ومش عارف احكى لحد فبحكى لللمدونه والناس بتسمعنى وتساعدنى

    دا اسمه كبت جوايا بخرجه للناس والمدونه

    لكن غير كدا او مفهوم غير كدا اظن انه مزايده من الصحفى المحترم

    وسلام عليكم يامكبوتين .. تقريبا تهمه جديده


  3. اختى الفاضلة

    السلام عليكم ورحمة الله وبركاته

    ليس كل مايكتب ممكن أن يقرأ فهناك مايكتبه حاقد أو حاسد أو متباه أو مدع أو عاشق ولهان لايستطيع الوصل لمراده وكلها كتابات لا أفضل أن اقرأها واذا قرأت وقادتنى الصدفة اعتبر أننى اطلعت على نكتة بايخة فلايهم أين أنت ولكن المهم إلى أين تتجه فاكلمى واكملن بنات حواء طريقكم فى التدوين بغض النظر عن الحاقدين والحاسدين
    ولك تحياتى
    اخوكم طارق الجيزاوى
    مدونة طرقعات فجائية - مكتوب


  4. أنا متفق جزئيا مع فكرة الكبت دي
    لأننا شعب مكبوت بالكامل،، المثقف والجاهل والمستوروالمفلس والعاشق والولد والبنت، كلنا مكبوت.. ولولا هذا الكبت لما اتجه أحدنا إلى المدونات.. لنفرغ كبتنابعيدا عن ضوابط الإعلام التقليدي

    هي كبت دي كلمة قبيحة؟؟
    تحياتي


  5. حسن مدني
    لا الكبت مش كلمة فبيحة ولا حاجة بس لما تلاقي حد عاوز يفرغك من معناك ويحطك في مكان مش مكانك يبقي لازم يكون ليك وقفة
    الأخ اللي قال الكلام ده صنف الكبت علي انه بسبب العادات والتقاليد يعنى البنات بدون علشان تخرج عن العادات والتقاليد مضمون الكلام مش كويس وياريت ترجع للموضوع علي مدونة مومب آبي علشان تقرا وتفهم
    http://appyplant.blogspot.com/search/label/فقعه%20مرارة
    تحياتي لمرورك الكريم


  6. Empress appy Says:

    منكن ارد على الشاعر
    يا شاعر اللى قال الكلام ده بتاع الكبت الجيزاوى نيهاهاهاهاها مش الصوحفى ههههههههههههههه
    قاله تعقيبا على كلامنا ورايه فى المدونات


  7. غير معرف Says:

    اسكتي يا مكبوتة منك ليها.


  8. Unknown Says:

    ايه يا وومن ما الشعب كله مكبوت
    مس المدونات البنات بس حتى اللى كتب كدة اكيد كان مكبوت من واحدة مدونة اقترح تكوين تنظيم المكبوتين ضد الكبت المتين ههههههههه

    رائعة طمطم كعادتك تحياتى


  9. غير معرف Says:

    بعدإضراب ٤مايو ،إضراب ١ يونيه هو إضرابنا القادم؛ثم الإضراب الأكبر هو يوم الأربعاء ٢٣ يوليو وهو في ذكرى الثورة التى لم يبقي مبارك من مبادئها إلا إسمها!ورغم أنه لم يكن من بين الذين قاموا بها ،إلا أنه الوحيد الذي استفاد منها!! رغم إرتداده عنها،بتأسيسه مملكه صهيوصليبية بإيعاز من أخوال أولاده ذوي الدماء الأنجلوسكسونية!حيث يسري في عروقهم دماء جد سوزان الصليبي ريتشارد كلب الأسد!أخي المذل المهان،أخي الفقير العدمان ؛إستعن بالله وقم بثورتك الآن وحدك!سينضم إليك الخائفين لاحقاً لامحالة !ليس عندك ماتخسره...إنتفض لكرامتك..إسترد حقوقك المنهوبة..أعد لمصر عروبتها وريادتها وحيادها الإيجابي بعد أن أرتمى نظامها في أحضان الصهيوـصليبية للتآمر على إستخراب الوطن العربي والمساهمة في تنفيذ آخر مراحل المشروع الصهيوني لقيام إسرائيل الكبرى في الربع الأول من هذا القرن!لقد أصبح حلف القاهرة الجديد أخطر ألف مرة من حلف بغداد القديم!!سالم القطامي


  10. يورو Says:

    انا بقرا الكلام
    عادى
    مش حساه غريب ولا حاجه
    الكبت دا اصبح عند كل الناس
    والحمد لله اذا موجود عند حد بيعرف يخرجه بالكتابه
    احسن م يفضل جواه ويدايق بيه الى حواليه

    عموما ولا يهمك يا قمر
    ناس مكبوته وقالت كدا

    تحياتى


  11. لسة قارى الموضوع ده عند ابى ياميرا

    وزى مالشاعر قال

    نطلع كبتنا
    سواء بنات او ولاد فى مدونتنا

    بس المهم هيكون صادق وطالع من القلب


    السؤال بقى مين سبب الكبت

    تعرفى

    انا كان نفسى اعيش فى عصر سيدنا عمر بنا الخطاب ومش عايز كمبيوتر ولا دش ولا موبايل

    بس كنت عايز اعيش لسبب واحد

    احس بالعدل ولو مرة

    فعلا احنا مفتقدين الشعور بالعدل


    تحياتى وتقديرى


  12. Abd-Alrahman Says:

    يا ميرا الدنيا كلها بقت بتتكلم علي الكبت والزعل مش عارف لية
    ياريت يا ميرا متحاوليش تعيشي نفسك في الحالة دي
    حتي لو انتي في الحقيقة مكبوتة زينا حاولي تخرجي منها
    علشان الصحة يا ماما
    وبعدين انتي يعني عندك كام مرارة
    هههههههههههه
    اكيد 7 زي اي واحد من الشعب المصري
    طبعا معادش منهم الا واحدة بس هيا الي شغالة
    يعني خلاص
    حاولي تحافظي عليها

    ويا ست المشهورة انا بعت لك اللنك بتاعي علشان اشوف رايك في البوست الاخير بتاعي
    مش جيتي لية ؟؟؟
    علي العموم هوة برضة بوست مضر بالصحة
    فاحسن انك مش جيتي
    بس برضة مستنيكي لما تخفي من بوست النهاردة

    هههههههههههه

    عبدالرحمن


  13. انا فعلا باعتقد ان المدونات دى اخراج لطاقه مكبوته

    وهوا مش غلط انى ابقا مكبوت واخرج طاقتى فى التدوين

    بس ده راييى انا شايف انه صح بالنسبه لوضعى الشخصى فقط



    احيكى على الطرح

    دعواتك


  14. nanosa Says:

    والله اللي عايز يتكبت هو حر ف نفسه
    لكن ما يطلعش كبته ده ع الناس
    تقبلي منى خالص التحيات


  15. ميرا

    ااقول ايه طيب مش عارفة لما البنات مكبوتين ومش عارفة بقي اشمعني اختار بنات الاقاليم خدي بالك انا من اقليم دمياط الميمون المطحون والمسالة تمسني وتمس كل الاقاليم المجاورة لاقليمي المحبوب

    حضرته يعني ماوضحش ايه اللي هيكبت الاقاليم ؟؟؟؟؟؟ده حتي الحياة في الاقاليم معروف انهاايسر من القاهرة كتير واشد رخاء

    كلام مرسل لشخص غير دارس ولا عالم ببواطن الامور ولكن واضح وهو ماشي باليل بيتمشي علي النت وقع تحت ايد مدونة ضايقته بكلامها فوصفها بالكبت

    ماعلينا

    رايه وواجب علي كل البناتييت

    اجتنابه

    تحياتي ياقمر


  16. nosha Says:

    إلى العزيزة وومن
    وإلى كل البنات المكبوتين
    والشباب المكبوتين قبل البنات
    إيه المانع لما يكون فيه كبت للناس كلها سواء بنات أو شباب أو حتى أطفال وعواجيز الكبت موجود عند كل الناس
    بس مش في كل الحالات وطالما إن الكبت ده بيطلع في صورة وجهة نظر وتعبير عن أي شيء وفي ضوء كل احترام وأدب وأخلاق إيه المانع لما يكون فيه كبت ..... إنما غير كده فده ممكن ميكونش كبت لكن يكون أي حاجة تانية .. والله أعلم
    تحياتي لكل المكبوتين من الشباب قبل البنات


  17. غير معرف Says:

    أنا من زمان بقول عليكِ مكبوتة

    ومن جوة معاميقك النفسية

    معقدة

    ههههههههههههه

    ((انا مع الشاعر أن المفروض اللى بيتكلم يوضح مفهومة للكبت ))


    أتمنالك دوام التوفيق

    نيجوووووووووووور


  18. غير معرف Says:

    اعمل انا بس اكتر من كده
    حطيت يافطه بالنيون علي المدونه
    اعترفت فيها ان المحروسه
    صاحبه المدونه بنت واقاليم
    عشان ابقي نورت الناس من بدري
    هههههههه
    ربنا يهديهم بدل ما نطلع كبتنا
    عليهم


  19. Unknown Says:

    العزيزة / وومن
    منك لله على الصبح كدة لسه عاملين الاصطباحة زى ما قلتى .. وتفكرينا بالكبت !!!!!!!!!!!!!
    يعنى هى ناقصه كبت كمان فى المدونات
    انا غلطان علشان فتحت رسالتك وحرمت اخر مرة معنتش خلاص سيبينى امشى ينوبك ثواب .


  20. جزاك الله خيرا على المرور عندى وعلى تعليقك الجميل


    تقبلى تحياتى

    Omar
    :)


  21. معلش يعنى انا كنت فاهم انه بيتكلم عن الكبت بمفهومه الواسعه الشامل العام المستعرض المستطيل بس فى مداخله مع ابى وضحت ليه مفهومه من الكبت وبما انى ابى عرفه المقصوده من الكبت بالنسبه ليه ده معلش انسان مفيش داعى يعنى ورائيه غير موضوعى من الاساس فلا ياخد به


  22. funckydoctor Says:

    كبت ايه بس
    ده انتو بس لللى بتقولو
    الباقى هو المكبوت
    نحياتى


  23. مستنين جديدكم

    :)

    ربنا يقدر لك الخير

    دعواتك


  24. rtrcbh Says:

    السلام عليكم ورحمه الله وبركاته
    اعتذر اولا على الاخير فى الرد على الموضوع لظروف بجورا المتحانات
    الحقيقه انا كنت قرات الوضوع منذ فتره
    وتعقيبى عليه ان الانسان لا يعيره اى اهتماما نظرا لان ابسط انسان عاقل سوف يعلم ان كاتب الموضوع غير متابع للمدونات والكاتبين الامر الثانى هو مدى الضيق فى الفهم لديه كما انه لديه فكره مسبقه عن موضوع الاقاليم والعاصمه بغض النظر عن ماهو مكتوب بالمدونه
    وجزاكم الله خيرا واكرر اعتذارى على التاخيرى والسلام عليكم
    اخوك
    د/أحمد جمال


  25. Abo-Harees Says:

    السلام عليكم
    كلنا بداخلنا كبت والشاطر اللى يعرف يوظف الكبت اللى بداخله ويستفيد منه كويس .
    مش اللى يزود كبته على الناس أو يعلق على حاجه مش فاهمها فيزيدنا كبتاً على كبت وغلباً على غلب

    بصراحة بصراحة بصراحة
    أنا حقولكم على حاجه سر خالص
    أنا إنسان جوايا كبت
    ايوه جويا كبت بس متقولوش لحد

    ومين فينا ملهوش كبت
    كلنا لينا كبت وكلب وكحال كمان
    ههههههههه

    اللى عنده كبت ويعرف يخرجه بصورة كويسه أفضل بكتير من غيره

    الراعى