ميرا ( وومن )
انهاردة كالعادة خرجت من البيت علشان اروح الشغل وقولت دعاء الأصتباحة وكلة تمام ووقفت علشان اركب ميكروباز اصل انا مقاطعة التك توك
لفت انتباهي ان في حاجة غريبة ايه هي مش عارفة بس الشارع شكله مش طبيعي
- يمكن يا وومن علشان خارجة بدري ولسه البياعين مجوش
- مجوش ايه يابنتي دول تقريبا بياتوا هنا اشمعني انهاردة الشارع فاضي ؟
وبعدين الشارع برضة في حاجة غريبة يا تري يا هل تري ايه هي ؟ ربنا بقي اراد إني مقعدتش اضرب أخماس في اسداد كتير اتلفت يميني كده اشوف أي ميكروباز جي الاقي ايه من بعيد خير الله اما جعله خير يارب عمال بتوع هيئة النضافة والتجميل عمالين كنس وتنضيف في الشارع
- بس هي دي اه الشارع انهاردة نضيييييييييف جدا
-
غريبة انهاردة الخميس ويوم السوق كان التلات يعني المفروض الشارع يتنضف يوم الأربع طب هما فعلا ادوله وش نضافة يوم الأربع بيلمعوا فيه انهاردة لية ؟
كان ساعتها الميكروباز جه نطيت فيه وقعدت في مكاني المفضل جنب الشوباك كل ما اعدي علي شارع الاقيهم شغالين علي قدم وساق ودراع كمان تنضيف وكنس ولم زباله حاجة غريبة
لما روحت الشغل اتصلت بابتي ( بابا ) حبيبي علشان اسأله وقالي
- اصل فلان الفلاني ( شخصية مهمة ) جي انهاردة يشوفهم عملوا ايه في الجامع
- الجامع اللي بقالهم 3 سنين بيبنوه ده
- اه
- اللي تبع وزراة الأوقاف ده
- ايوة
- اللي بانين حوالين بقيت الأرض يتاعتة سور وكاتبين عليها ممنوع إلقاء الزبالة بجوار السور الزبالة مكانها الصناديق يا بني آدمين ومفيش اصلا صناديق ده
- هو بعينة
- لا يا بناتي معرفوش , عموما تشكر يا عم الحاج سلام بقي علشان انت عارف السبوبة ليها أحكام
حاجة غريبة بجد يعني هو الشارع لازم يفضل معفن والزبالة متكومة فيه ومنطقة بحالها مفيهاش صندوق واحد ولا بيعدي فيها كناس لله غير لما حد مهم يعدي وبعدين يرجعوا يقولوا أننا شعب همجي ومش نضيف ومش عارف ايه طب انا مرة جيت ارمي علبة كانز في صندوق لقيتهم سايبينوه مفتوح من تحت واللي بيرمي فيه حاجة بتقع في الشارع علشان المحافظة بتاعتنا شعارها الجيزة مدينة نظيفة فيبقي في صناديق بس ملهاش لازمة
يالهووووووووووووووووووووووووي
24 Responses
  1. غير معرف Says:

    والله مش عارف أقولك ايه المشكله انها مش عاندك بس ده في كل مكان فيكي يامصر
    والمشكله فالضماير أصل مافيش رقابه ولما نيجي نتكلم يقولوا ماأحنا شايفين شغلنا اهو والله عندك حق حاجه تغيظ


  2. ههههههههههههههه


    حلوة الخودعه دى

    سلة المهملات اللى مفتوحة دى

    ضحكتنى

    على فكرة مصر كل اللى فيها اشكال غير حقيقية

    خيالات مآتة
    تقدرى تقولى كدة


  3. Cold air Says:

    أنا بتمني من زمان حد من الناس المهمين
    يعبر الحي عندنا
    يمكن ربنا يرضا عنه وينضف زي الحي بتاعك
    وحاولي تستمتعي بوقتك قبل الثلاثاء اللي جاي

    هه ^_^ هه ^_^ هه

    ده جه خلاص باي باي نظافة
    واهو برده عشان متفضليش مستغربة


  4. Unknown Says:

    هو من امتى يا ميرا الشوارع بتنضف غير لما بيكون فلان الفلانى معدى


  5. شريف

    مش عارفة من كتر ما الواحد هايتغاظ هايروح فين بعد كدة
    ربنا معانا

    ***********************************
    مدحت محمد

    المشكلة ان كل حاجة في مكانها بس ملهاش لازمة
    يعني هما لوا عملوا كل حاجة صح هايروحوا النار


  6. cold air

    اظاهر اننا اتعودنا علي الزبالة والقرف النظافة بفت حاجة غريبة علي عنينا
    تحياتي

    ***********************************
    هيثم الدهشان

    عندك حق يا هيثم كان المفروض اعرفها لوحدي


  7. Empress appy Says:

    اييييييييييييييه انتى متعرفيش انهم بيحطوا كمان اسفلت ويلموه بعد الزياره ههههههههههههه
    انا لو منكم بجد اقعد اروح للراجل المهم واقوله قومى روحى قولى له على اللى بيحص ده (وش بيطلع لسانه) عارفه علشان متقدريش ههههههههههههه
    يا حبيبتى انا عارفه ناس اتحط لهم باسكت زباله سرقوه وباعوه يبقى العيب فين هاااااااا قولى فى الاتنين معلش مش تتغاظى


  8. ووووووومن دا الطبيعى

    بس خلينى اقول لك نقطه مهمه جدا ان فى حاجه اسمها ثقافه شعب

    وثقافه شعبنا المصرى الكل عارفها

    كل واشرب وارمى فى المكان اللى انت فيه

    ومش هقول لك على الحاجات التانيه اللى ممكن بنى ادم يعملها فى الشارع قد يستحى الحيوان على عملها


    فبعيد خالص عن ان فى مسؤل معدى ولا حاجه

    لو ثقافه شعبنا المصرى اتغيرت اتجاه البيئه والحفاظ عليها مش هننتظر ان مسؤل معدى علشان ينضف


    ولا انا غلطان


  9. أبي

    اه ما انا عارفة اسفلت وشجر وحشيش ممكن يعملوا كمان حديقة محمولة تتفرش وتتلم تاني

    بس ده برضة ميمنعش اني متغاظة واحسن حاجة انك مش هاتعرفي ترشي فلت
    هههههههههههههههههه

    ***********************************
    شاعر

    انت بتتكلم صح بس الثقافة دي مش ثقافة عامة وهاديلك مثل لما زرت اسكندرية اول معاملوا كوبري استانلي المكان كان غاية في الجمال والروعة وفي هناك مكان علشان الناس تقعد فية في نصة نافورة حلوة
    المكان اللي معمول علشان الناس تقعد فية مفيهوش باسكت واحد طب اللي جاي ومعاه لب او ترمس او درة مشوي هايرميهم فين
    طبعا كانوا بيرموها في النافورة يعني مش مدين فرصة للناس تحاول تتصرف صح


  10. بصي يا ميرا انتي عارفة لو كنت قلتي حاجة غير كدة كنت ها اقولك انت أيد مش في مصر

    بس بعد اللي انت حكيتيه دة ها أقولك

    يبقي إنتي أكيد مش أكيد بس مليون أكيد أكيدات العالم كلها يبقي انتي أكيد في مصر

    هي دي مصر أم الدنيا
    حكومة فاسدة .. شعب نايم

    وربنا ينتقم من الظلمة

    ابسطي بقي ان شخصية مهمة ها تعدي من عدم المنطقة نضفت ههههه


  11. ومن هانم

    اولا ده العادى بتاعنا

    ثانيا انا عجبنى شويه الفاظ و كلمات منك اوى
    زى الميكروباز
    و الشوباك
    و التك توك
    ههههههههههههههه
    و وربنا عسل


  12. قلم رصاص

    هو طبعا أكيد اكيد انا في مصر بس هي مصر ملهاش نفس مرة تغلط وتعمل حاجة مش متوقعنها منها

    ***********************************
    مارو

    لو علي الألفاظ اتفضلهم دة جزء بسيط من القاموس الخاص بتاعي انا واخواتي
    شكرا علي مرورك


  13. nanosa Says:

    السلام عليكم
    وحشتيني ووحشتيني كتاباتك
    وعجبتني اوي حكاية صندوق الزبالة اللي مالوش لازمة ده
    وهو ايه عندنا بقي ليه لازمة
    ؟؟؟؟؟؟؟؟؟؟؟؟
    لكي خالص تحياتي


  14. والله انا لو منكو لو حد جى يزور حى ولا بتاع ونضفو المكان تنزلو انتو وتجمعو وتدلقو زباله فى الشواره افضحوهم اتعونو مع بعض دا الحل الوحيد

    مرسى جدا على طرحك لبوست اتمنا مكنش طولت عليكم واتمنا زيرتكم


  15. ننوسه

    بجد والله انا نفسي وحشتني الكتابة ربنا يجازيها الأمتحانات

    هو طبعا مفيش حاجة عندنا ليها لازمة بس اهو تقدري تقولي انهم بيعملوا اللي عليهم علشاب يبقي عداهم العيب وقزح

    نورتيني يا قمر

    ***********************************
    أدم
    تصدق فكرة هايلة بس المشكلة مشكلة تنظيم هما كانوا موجودين الصبح بدري انا كنت رايحة الشغل يومها بدري يعني هما برضوا عاملين حسابهم ووخداين الناس علي خوانة
    والناس مابتصدق يوم يعدي عليها وشارعه نضيف


  16. Ahmed Mohi Says:

    ده العادى بتاع شعبنا من ايام فرعون
    النفاق وعمل حساب للمظاهر
    ماتدايقيش نفسك


  17. مدونتك دى طلعت جامده بجد


    يمكن احسن من التانيه كمان

    اوبتنافسها


    لو بتبحى مدونتك التانيه اكتر اقتلى مدونتك دى قبل مااتاخد الصداره


    ماشى ياوومن

    هاااااااااااااااااايله بجد


    ربنا يوفقك ياااااااااارب


  18. احمد محي

    هو شعبنا هايفضل كدة علي طول ولا ايه مش هانغير بقي

    ***********************************
    حسام

    جامدة جامدة مفيش أحسن من أن الواحد ينافس نفسة


  19. فعلاً حكاية الصناديق المفتوحة من تحت دى حصلت معايا
    كنا ماشيين فى الشارع انا و امى و بناكل جيلاتى
    و لما خلصنا امى رمت الورقة فى البتاع اللى متعلق على العامود
    و الورقة وقعت من تحت
    المشكلة مش فى كدة بقى
    المشكلة فى بصة الناس لينا
    هههههههههههههههههه
    الناس حاطة فى دماغها ان اللى يرمى الحاجات دى فى الأماكن المخصصة ليها يبقى شايف نفسه و بيتنطط
    ههههههههههههههههههههههههه
    اه و ربنا
    يللا ... ربنا يستر على عباده
    سلام


  20. ههههههههههههههههههههههههههههههههههههههههههههههه

    حلوة أوى بتاعت السلة الى مفتوحى من تحت

    إحنا بقا أصلا معندناش حاجة اسمها سلة أصـــــــــلا


    بس هوا يجى مسؤل واااحد ... وتلاقى البلد بقت كلها سلات ونضافة رهيييييييييييييييييييييييبة


    الله المستعان

    شكراااا ليكى أختى على البوست الحلو دا

    أخوكى


  21. مهيج الجماهير

    اهلا وسهلا بيك

    انا عارفه انت تقصد ايه طبعا بشوف البصة دي كتير

    لسه برضة قدامنا كتير

    تحياتي

    ***********************************
    إخواني حتي النخاع

    اهلا وسهلا شرفتني بزيارتك وتعليقك


  22. طبعا الشارع والبلد كلها لازم تكون مش نضيفه الا في وجود مسئول امال البلد باضت من ايه
    تقبلي مروري


  23. الصندوق اللى مفتوح من تحت ده ماكنش كده الأول
    كان مقفول بس بتاع النظافة لما بييجى يفضيه بيفتحه من تحت لأنه متثبت فى العمود وبعدين علشان ما يشتغلش ويفضيه كله يوم يستسهل ويسيبه مفتوح.
    عرفتى بأى إن الجيزة مدينة نظيفة بجد


  24. غير معرف Says:

    انضف بلد فى مصر الجيزة

    اكيد انا زرتها قبل كدة بس مقعدتش

    علشان مش متعود على نضافتها

    متعود على الشوارع المصرية المزبلة فى كل انحاء المعمورة