لاء بجد متغاظه ، لدرجة إني بكتب أهو ..........هو من أمتي بقي البني أدم مننا بيتقيم بشوية حاجات ، من امتي الواحد بيشوف نفسة شقة وعربية وموبايل ووظيفة؟؟؟؟؟
بقول الكلام ده بعد ما نصيبي اللي عارفاه وقعني في نموذجين في شهر واحد ... وخبطتين في الراس توجع
الأول كان في صالون بيتنا العامر وبعد مفاوضات ومشاورات قولت يلا اهو أحنا داخلين علي موسم وكده كده ها نفض الشقة اعملها بجميلة بقي وبعد كام خناقة مع الحاجة علي هالبس ايه والف الطرحة أزاي وتوهان العريس في الطريق قعدنا في الصالون مع اهله وابتدينا التحقيق عندك كام سنه ؟ درستي إيه ؟ بتشتغلي فين ؟ من أمتي ؟ من كام لكام ؟
ياربي مكنش فاضل غير اني اتسأل بأقبض كام ؟ المهم عديت وجاوبت وكل ده والعريس قاعد في الكرسي منفوش ومبتسم 4×4 وكأنه أبو زيد الهلالي وجاي يفتح تونس الخضرا .
مطولش عليكم بقي قولوا طولي باباه طلب اننا نقعد مع بعضينا وراح مشاور علي السفرة قولت فرصتي بقي المهم قولتله خد فرصتك واحكيلي عن نفسك
نفسه دي بقي كانت عبارة عن الشقة ام حمامين الـ 165 م علي أساس إن شقتنا بحمام واحد وطبعاً ده بالنوسبه ليا املا . وهنا اخواني كان ليا وقفة كله الا حمام بيتنا ده ليه مكانة خاصة في قلبي ده منطقة تأملي المفضلة واهانة لن اسمح بها بس قولت يابت طنشي خاااااااااااالص وافتكري اللي الحاجة هاتعملة لو ابتسامتة تضائلت 2 ملي بس ، ماشي يا سيدنا غير الشقة ام 2 حمام ... اه الـ 165 م ، عربيتي وإن شاء الله بشوف وظيفة احسن وبس ....
يعني ايه وبس طب هاتتجوز ليه ؟ جاوبني إجابة مش مقنعه ، طب ايه مواصفاتك في البنت اللي عاوز تتجوزها ؟ تقريباً مفيش مواصفات وكان ناقص يقولي اللي هاتوافق عليا هاتجوزها وتكون بتعرف تطبخ كويس – مش عارفة ليه ترددت في أذني رائعة الجميلة صباح عاوز طباخة سكة حديد - ، طب ياعمنا إيه طموحك في الحياة ؟ فالاقي ان طموحة توقف عند الشقة الـ 165 م
وقتها قولت لنفسي شلوه من قدامي وخلوه يروح مع أهله سليم والحقيقة زي مايكون بابا استشعر هجوم قادم وهو عارفني بقي لما اقوم بهجوم مضاد فلم الليلة وانهي المقابله وعملني تسليتة طول الليل كل ماشوف وشي يقولي وافقي يا عبيطة الراجل عنده شقة بحمامين ........هع هع هع هع – هو ده بونتي –
النموذج التاني بقي فرسني فرسني بجد وكان لقائي بيه صدفة وهو نوع من الشخصيات اللي في كل كلامة لازم بطريقة غير مباشرة يعرفك انه هايغير عربيتة في اقرب فرصة وانه دفع في اللي معاه دم قلبة ومش هاتساوي لما يبيعها وشوية ويجيب سيره اتحاد الملاك اللي بيطالبه بنور السلم وهو لسه مش ساكن فاتفهم بالحداقة ان الشقة تمليك وبالمناسبة قال وبمنتهي الفخر ان الشقة مش بحمام واحد ولا اثنين لالالالالالالالالا بتلاتة – نفسي افهم ايه علاقة الفشخرة بحمامات الشقة – وانه عضو في اتنين من أهم نوادي العاصمة .
المهم اني مطيقتش اقعد مع الشخصية دي اكتر من ساعه واستحمل غروره وصلفة وهو بيكلمني علي اساس انه لقطة وان البنات بتترمي عليه وانه خليفة حسين فهمي في زمانه ولم تفلح محاولات تطنيشة او الإنشغال بالحديث مع احد من الجمع فعنده اصرار غريب علي تعريفنا بجميع مميزاتة السابقة الذكر للي يعرف واللي مايعرفش فانسحبت من القعده وانا مستغربة أزاي الرجالة باصه لنفسها البصة دي شايفين انهم لقطة بالشقة ام كذا حمام
طب فين الشخصية ؟ فين الحضور ؟ فين الطموح ؟ فين الثقافة ؟ فين الرجولة ؟؟؟ دي بالذات فيييييين ؟؟؟؟؟؟
وعلشان كده بقول اهو الرااااااااااااجل مش بس بشقتة اياً كان عدد حماماتها
يالههههههههههههههههههههههههوي
|
عبيطة يا ميرا
حد يضيع فرصة زي دي
يبقى عندك حمام صيفي بدل ما تروحي الساحل الشمالي
وحمام شتوي بدل ما تروحي تشتي في أسوان
غلطانة وستين غلطانة
وبعدين أيه الحاجات اللي بتقولي عليها دي
شخصية أيه وحضور أيه وطموح أيه وثقافة أيه لأ والأدهي والأمر بتدوري على رجولة كمان
دا أنت مفترية أووووي
يا بنتي كله بيتقاس بالحمام دلوقت
بالحمااااااااااااام
هههههههههههههههههه
كل ديه حمامات...ليه حمام كليوباترا (^_^)
والله يا قمراية انا استغربت جدا للعريسين العجيبين دول..
بس هقولك حاجة انتي بعقليتك ورقيك متسمحيش لنفسك بمجرد التفكير ف حد زي كده..
انما فيه بنات تانين مادين ومخهم واخد اجازة أبدية ممكن يوافقوا على العرسان ديه يعني بمعنى اصح مفيش رجل وحش ايا كان عنده طموح او لا راجل بحق ولا لأ كمان..
مش كل الرجالة كده ومش كلهم مش كده
بجد ضحكتيني شوية حلوين
تسلم ايدك
فكرتينى بفيلم هندى
الراجل بيقول نكتة واحد هندى راح امريكا و عزم والده يجى يزوره و لما بيفرجه على البيت بيقوله عندى ثلاث حمامات (سباحة) ، الوالد قاله ليه، قاله واحد املاه ماية ساقعة فى الصيف و الثانى املاه ماية سخنة فى الشتاء و الثالث؟؟ ده اسيبوه فاضى علشان لو مش عايز اعوم اصلا :-)))))))
عرسانك دول فى طور يبقوا هنود يا ميرا
ربنا يصبرك و العريس الاخير يكون راجل فعلا و بفيلا وحمام سباحة كمان (كله ممكن):-)
تصدق اني كنت فاكر ان انا الوحيد اللي اتكلمت عن الموضوع ده في مدونتي
اتاريه طلع قضية قومية
والله شباب غلبان هنعمل ايه
انت عبيطه يا بت ؟
دة اهم حاجه الحمااااام
وتدخلى جوة وتشغلى السخان وتقعدى براحتك
ولا حد يخبط على الباب
ولا اخرجى يا ميررررا مزنوووق
ولا تشوفى وشه من أصله
خديه خديه
وخدى منه الحمام وطلقيه
ههههههههههههههههههه
الشخصيات دي ممكن تصيب الي قدامها ببلاهة واعاقة مستديمة
(:
واهي شقة و غارت (:
المهم سلامتك
(:
براحة يا جماعة بس كده
انا عارف اني الموضوع ده بناتي
بس هاقول رايي بالدراع
الاصل زي ما علمنا النبي
ان الراجل بدينه واخلاقه الاول
علشان كده انا مواقف علي البوست بقوة
طبعا
الراجل مش بس بسقته
هع هع هع هع
اية قمر مالك مخنوقة من العريس اوي كدة
يا بنتي كله نصيب
ههههههههههههههههههه
بقالي كتير مجيتش عندك
وكمان لاقيتك قافلة مدونتك
امراة بعقل رجل
ماشي يا ستي
اخبارك اية ؟
يارب تكوني بخير
تحياتي
منتظر زيارتك
الصيدلي المطحون
هههههه..بجد ضحكتيني على طريقة وصفك..
ولو اني مش من انصار الجواز بالطريقة دي..مش متخيل حد يرتبط ويعيش مع انسان بدون ما يكون بينهم قصة حب او انهم يتعرفوا على بعض بالطريقة التقليدية والاسئلة التقليدية دي(طبعا ده راي شخصي)..
وعجبني قوي عنوان البوست (';')
يا بنتى ما حدش قالك ان الطموح والشخصيه والافلام الهندى دى خلصت بعد الحرب لما ماتت الرجاله فى الحرب فبقى طبيعى ان الراجل مش بس بشقته الراجل بحمامه فى بيته وحتته اى خدمه فقعتى مررتى اكتر ما هى مفقوعه
اهي دي مشكله البنات الصغييرين اللي مش عارفين مصلحتهم !!!
لما تتجوزي واحد وتكون الشقه بحمام واحده ، لما تخشي تعيطي في الحمام حيخبط عليك مش ولامؤاخذه لانه قلقان عليكي ولا لقاكي اختفيت فاتخض لا لانك قافله باب الحمام وحرماه من الراحه وطبعا ساعتها حتطلعي من الحمام وان لسه ماخلصتيش العياط ولا خدتي راحتك !!! وحيسالك بغباوه كنت بتعملي ايه كل ده ومايستناش يسمع الاجابه وحيخش ويرزع الباب في وشك !!!
ايضا ، حلوه ايضا دي ، ايضا ، الراجل اللي عنده حمامين ، ممكن في المستقبل مع وجود الاطفال ، تلاقي الحمامين مايكفوكيش ، لان العيال مبهدله حمام ومحتلاه وكله ميه علي الارض وهو محتل الحمام التاني وعايش يغني تحت الدش وانت واقفه مفروسه
فالحمام التالت نعمه حتي لو كان حمام صغير ومن غير دش ، لان مخبأ كويس ... يابنتي ركزي واعرفي مصلحتك وتلات حمامات احسن من اتنين واللي مايعرفش يقول رجوله !!!!!!!