ميرا ( وومن )
حدثت أحداث هذوه الموقعه السنة اللي فاتت لما سيبت الشغل وركنتلي في البيت كام شهر كدة لا شغلة ولا مشغلة وصباح الأنتخه.
ومرة من ذات المرات لاقيت ماما بتندهلي ومتعصبة
- يا خيبتي القوية انتي هاتفضلي لازقة قدام الجهاز كدة قومي أعمليلك منظر وساعديني في أي حاجة
- هو انا اعترضت يا مامتي قوليلي بس عاوزاني أعمل ايه وانا من عنيا
- طب يا شملولة قومي أغسلي المواعين المكومة في الحوض دي
- !!!!!!!! مواعين ... أنا ... عاااااااااااااا لا شوفيلي حاجة تانية
- لا هاتغسلي المواعين وتشطبي الحوض وتنشفي الأرضية
طبعا قومت رغم أنفي ووداني كمان ودخلت زي الشطورة كدة وشمرت عن كومامي واستعنت علي المواعين بالله
وطبعا لا يخفي علي اي حد أن غسيل المواعين يلزمة صابون مواعين وسفنجة أو سلك مواعين وفي طبق أو علبة كدة علي كل حوض في كل بيت دي اللي بيتحط فيها الصابون وتغمس فيه السلكة أو السفنجة
حلو كدة ... زي الفل ومفيش مشاكل ، دخلت انا بقي المطبخ وبصيت يمين وشمال وحطيت الصابون في أيد والسلكة في إيد و انا بردد الرائعة الشعبية
- أنا أغسل أغسل اغسل ياهانايا في يوم غسيلي
المهم أني لاحظت ( خدوا بالكم من لاحظت دي ) ان الصابون مش بيرغي بس مع ذلك ولا همني و لا تأثرت ولا تراجعت ولا حااااااجة
وبعد كام كوباية علي كام طبق كدة لاحظت برضة أن الكوبيات والإطباق مش بتنضف
قعدت أفنكر و أفنكر يا تري المشكلة فين ؟؟
قولت لروحي يا بت يا ميرا يمكن الصابون قليل ؟؟ زودت الصابون مفيش فايدة
يمكن السلكة نوعه مش كويس ؟؟ غيرت السلك وبرضة الأطباق مش بتنضف والكوبايات شكلها ميسرش
قولت لروحي وبعدين في الخيبة القوية دي ماما هاتقول عليا ايه ؟؟ بصي يا ميرا أكيد أكيد الصابون ده فيه حاجة وبايظ وانا لازم أشهد ماما عليه أه مش هاسكت أنا طبعا
- مااااااااااااااااما يا ماما – انا من المطبخ –
طبعا ماما أتخضت وجت جري علي ملي وشها ( ونعم الأم بصراحة )
- ماما الصابون ده مش بينضف الأطباق والكوبايات ده شكلة بايظ ؟
- بايظ أزاي وريني كدة
طبعا ماما مسكت إزازة الصابون وقلبتها في ايديها ، وبعدين سألتني بمنتهي الهدوء انتي جبتي الصابون دة منين ؟؟
- من الضرفة دي يا ماما ( وشاورتلها عليها )
- برضة بمنتهي الهدوء طب يا حبيبة أمك عرفتي منين ان فيها صابون ؟؟
- مهو باين يا ماما شكلها شكل قزايز الصابون
- طيب ممكن كدة تقريلي مكتوب عليها ايه ؟
طبعاً خدت الإزازة وانا بقول لروحي ايه الأم الغريبة دي هايكون مكتوب عليها ايه يعني أهو شوفتي شامبو للسجاد والإنتريهات !!!!!!!
وطبعا من هذا المزنق مقدرتش أفتح بقي بكلمة ولا نص وماما ناولتي الصابون من تحت الحوض وهي لسان حالها بيقول
- أشوف فيكي يوم يا خبيتهم – حسبي الله ونعم الوكيل

23 Responses
  1. Ramy Says:

    الأول كل سنة و انت طيبة يا ميرا و العائلة بخير

    أنا مش قادر اصدق عنيا أخيرا افتكرتى المدونة الغلبانة دى

    هههههههه

    موضوع جامد الصراحة يعنى

    بس أكيد مع الخبرة هتعرفى فين الصابون (:


  2. Unique Says:

    كويس انه طلع من فصيلة المنظفات
    توقعت انه يكون زيت مثلا ههههههه
    شاطرة يا ميرا :)


  3. мαησηα Says:

    ههههههههههههههههههههههههههههههه

    انا افتكرته حاجة تانية مؤذية الحمد لله انه طلع من امنظفات

    ميرا ع فكرة انتى خيبيتهم فعلا اااااااااااا هههههههههههه

    معلش انا علشان صديقتك الصدوق لازمن اقولك الحقيقة دى بدل

    ماحد غريب يجى يقولهالك هههههههههه

    لا بجد تسلم الايادى يا قمر ..

    كل سنة وانتى طيبة

    رمضان كريم


  4. مصطفى ريان Says:

    وبهذه المناسبة نوجه التحيه للسيدة الفاضلة والدة ميرا لأنها صبرت عليها كل دة
    هي دي الامهات ولا بلاش وبهذه المناسبة نحب نعرف ماما ميرا ممكن تعمل ايه لو كانت في نفس الوضع


  5. والله انا كل يوم لما أقرأ ليكى بيزيد أقتناعى بيكى لأنك كاتبة رائعة ومعبرة انا بقرأ كنت معاكوا امام جهاز الكمبيوتر ولما ماما جت وقالتك اتشمللى وأغسلى المواعين يا فاطمة ولما دخلتى المطبخ هههههههههههههههه بجد رائعة يا ميرا انتى نوعية من الأناث الذكية القليلة فى العالم انتى تجعلينى أتخل كل كلمة تكتبيها بسبب أسلوبك الرائع المدل تمناياتى لكى بدوام الكتابات الرائعة


  6. كل عام وانتى بخير


    جت سليمة المرة دى ههههه


    واكيد الانسان بيتعلم من اخطائة
    تحياتى


  7. Baskouta Says:

    هالووو ميرا
    كل سنة وانتي طيبة
    حلو البوست ده
    بجد لذيذ
    رمضان كريم


  8. رامي

    كل سنة وانت بخير وسعادة

    اااه شوفت صعبة عليا قولت اجي اهويها وانفضها الا القافلة دي وحشة علشانها

    أدعيلي بقي أرجع لنشاطي التدويني الا حال المدونات مش عاجبني

    خبرة !!!!!
    مين دي اللي تاخد خبرة انا مش بتاعه الكلام ده
    ههههههههههههههه بص هي ماما فقدت فيا الأمل خلاص وبطلت تطلب مني حاجة

    -----------------------------
    Unique

    مهو منظفش حاجة يا يونيك غير اني خلصت يجي نص الإزازة وانا بجرب أنه يرغي

    وبعدين انا مفهمتش شامبو ايه اللي مش بيرغي ده ؟؟!!!!

    منوراني يا قمر


  9. мαησηα

    منونتي هههههههههههههههههه شوفتيني وانا خبيتهم مش اي كلام يا منون

    يعني لما ادخل المطبخ مش أقل من مصيبة

    طبعا طبعا صديقتي الصدوقة ولازم تصارحيني بس تفتكري في مني أمل ؟؟؟

    منوراني يا قمراية

    --------------------------------
    مصطفى ريان

    والله أنا عن نفسي يادرش بقولها ربنا يعينك علي ما بلاكي لو انا بنتي مش عارفة كنت عملت فيا ايه ؟؟

    ماما يا درش إستحالة تقع في مثل هذه الهفوات العبيطة دة لآنها عارفة مكان الصابون كويس طبعا


  10. MoHaMed AhMeD

    أ / محمد
    تشريف حضرتك ليا في المدونة وتعليقاتك ديماً لها صدي مميز

    أشكرك علي تشجيعك ليا

    خالص مودتي

    -----------------------------------
    انسان ممتنع عن الزواج

    إنسان منور المدونة وأهلا وسهلا بتشريفك

    هي المرة دي جت سليمة بس انا بقي ليا مع المطبخ صولات وجولات ودي حاجة منهم

    والحمد لله ان مش انا بس اللي بدخل المطبخ الا كنت قضيت عليهم واحد واحد


  11. Baskouta

    هاي يا قمر

    كل سنة وانتي بخير وبحب ربنا يحلي أيامك يارب

    تسلمي يا جميلة ده بس من ذوقك ، مبسوطة أنه عجبك

    الله أكرم


  12. كل سنه وانتى طيبه
    عادى اى حد فى البدايه بيبقى كده وبعدين بيحترف


  13. mrmr Says:

    طبعا انتى اتكسفتى وقلتى دى اول واخر مره ادخل المطبخ
    لكن ماما ح تقول اهى مره واتعلمت
    والجيات اكثر من الريحات

    اكيد اكتسبتى خبره ههههههه
    عقبال ما تشيطى الاكل هههههه

    كل سنه وانتى طيبه


  14. عمرو يسرى

    وحضرتك بالصحة والسلامة هي بس المشكلة اني المفروض إني محترفة بس بنسي مكان الحاجة فين

    وتلاقيني متسربعه وعاوزة اخلص

    دمت بود

    -----------------------------------
    mrmr

    منورة المدونة

    هو من ناحية اتكسفت اتكسفت بس مقولتش أول وأخر مرة لأني المفروض اني دخلتة كتير

    وياما ياما يا مرمر كان ليا فيه صولات وجولات بس الشغل بقي مش مديني فرصة اوطتد علاقتي بيه

    بالنسبة للأكل بقي انا عديت مرحلة التشيط والحرق خلاص الحمد لله

    تقبلي خالص ودي وتحياتي


  15. هوبتي Says:

    ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    والله يا ميرا فكرتيني بنفسي بس بما اني الان انا مسؤله عن بيت وحوارات من دي فا الحمد لله اتعلمت


  16. Abd-Alrahman Says:

    ههههههههههه
    دة عشان انت بيعد كل البعد عن مطبخكوا يا عسل
    ايوة كدة لازم تشوفوا العين الحمرا شوية
    بنات اخر زمن

    هههههههههه

    كل سنة وانتي طيبة يما مرمورتي
    يارب الايام تعود عليك بخير يارب

    وتكون كلها سعيدة ويارب يبعدك عن المطبخ تاني
    والحمد لله انك افتكرتي التدوين تاني


    تحياتي
    صيدلي مطحون


  17. هوبتي

    منورة المدونة يا هبوبه ، كلنا هذا الرجل بس انا الحمد لله لسة معنديش بيت ولا مسئولية وبصراحة رامياها علي اختي وانا بقي بشتغل مش فاضية

    -----------------------------------------

    Abd-Alrahman

    كل سنة وانت طيب يا عبد الرحمن وبعودة الأيام بخير

    ايوة في عداوة بيني وبين المطبخ وشكل هاتبقي بينا حززيات ربنا يستر

    الحمد لله اني افتكرتها عقبال ما ترجع انت كمان لمدونتك


  18. اقصوصه Says:

    رمضان كريم

    وكل عام وانتم بخير :)


  19. اقصوصه

    رمضان كريم علينا وعليكي ، كل عام وأنتي بألف خير


  20. هههههههههههههههه
    كلكم زي بعض
    المشهد ده شفته قبل كده
    البت تتحمق قوي وتقاوحني
    وبعدين تطلع مش واخده بالها
    ههههههههههههه
    ااقولك سر
    انا شفت المشهد ده برضه مع امي
    كنت ااقاوحها ااقاوحها
    وفي الاخر يطلع كلامها صح
    وانا كمان ااقاوح ومااقولش غلطانه !!!
    دي سنه الحياه وطبيعتها ..
    ابقي افتكريني لما بنتك تقاوحك !!!!


  21. اهاا هاهاه اهاهاه اهاهاها هاهاهاها


    والله العظيم اخر نكته .. كويس ان ولدتك مجرلهاش حاجة في الموقف ده .

    اهااا اهاها هاهاا هاهاهاه


  22. غير معرف Says:

    على كدة هتتعبينى معاكى

    هنحتاج نجيب خدامة


  23. ياخبر ألوان
    حاجه تغيظ بجد والله
    وحشتينى جدا ومعدتيش بتكتبي ليه ؟؟