ميرا ( وومن )
من اكتر الحاجات اللي بتغيظني وبتفرسني بجد قناعة معظم الولاد انهم ذوا تأثير لا يمكن محوه ، نفسي اعرف ايه السبب في القناعة دي وجابوها بناء علي ايه؟


كل الولاد دون جوانات ( جمع دون جوان ) ومقطعين السمكة وديلها ومفيش بنت عمرها استعصت عليهم والبنت اللي تنول شرف معرفتهم لا ينكن أبداً ينمحي من ذاكرتها ؟؟؟؟!!!!


ليه ؟؟ سؤال نفسي الاقي علية اجابة واصلا بسأل السؤال دة ليه ؟؟


علشان مبدئياً كدة قابلت في حياتي عدد لا له أول ولا اخر من الولاد وفي جميع المراحل العمرية يعني من ابتدائي لحد الجامعة – في مدارس مشتركة -  لحد كذا سنة شغل مفيش فرق بين ولد صغير او مراهق أو راجل كبير جميعهم بلا إستثناء عندهم نفس الفكرة سواء كان صديق قديم – زميل دراسة – حبيب سابق – مشروع إرتباط وفشل تلف الدنيا لفتها وترجعوا تتقابلوا فيستقبلك بنفس القناعه 


الحكاية دي بقت بتكرر بشكل يضحك وثقة مستفزة لدرجة ان في ناس تحلفلهم بالمصحف انهم ولا علي بالك ولا اصلا انت فاكرهم ولا اختفائهم مثلك اي شئ ومع ذلك يكدبوك بمنتهي الرزالة والتناحة واضطر ساعتها بقي اقلب علي الوش التاني واطلع لساني الطويل الزفر في ذات نفس الوقت 


يعني لما اللي قدامك يبينلك حجمك الحقيقي في علاقتة بيك بترفض الفكرة ليه وبتكدبها ؟ وتفسره علي انه تقل ؟؟


ودي اسخف حاجة في الموضوع تبقي بتتهرب من هذه الشخصية او بتفهمة بصراحة ووضوح ان علاقتكم ايا كان مسماها مش هاينفع تستأنفوها والطرف التاني بيقول لروحة دة تقل ؟؟؟!!!!


علي فكرة انا شوفت بنات كتير فاكرين نفسهم في جاذبية إليزابيث تيلور وإغراء مارلين منرو وحضور أودري هيبورت لكن مع ذلك البنت معندهاش قناعه "أنها تقبع في الذاكرة كبقعة حبر تغلغلت في ثوب قطني يخف أثرها نعم لكنها لا تمحي" 


الولد او الراجل بيبقي فاكر انه اخد قلب البنت توكيل وحق عرض حصري مع ان يعني اصلا الرجالة اللي عليها النطال ( يعني اللي رجالة بجد ) بقوا قلة مندسة الرجالة للأسف لا بقت جنتلة ولا شهامة ولا ثقافة ولا حاجات تانية كتير ومع ذلك كل واحد نافش ريشة زي الديك الرومي !!!!!

يالههههههههههههههههههههههههههههههههوي 
4 Responses
  1. samy Says:

    ازيك يا ميرا

    معقول دة بس صدقينى مش كدة خالص

    بس يمكن دة صح من وجهة النظر بتاعتك انتى اللى شفتى

    بس بجد يعنى اناليا زمايل عمر ما كان فى دمغهم هيوقعو دى ولا دى هتموت نفسها علشان دة ولا الكلام دة خالص

    انا بكلمك عن ناس دخلت كليات وشافو وكلمو بنات

    وعادى يعنى يمكن علشان احنا معشناش الجو اللى بتقولى علية

    فبشمتصورة

    بس كان ليا زمايل تانى زى ما انتى بتقولى بس مكنتش بسمع لهم كنا نقفل الموضيع معاهم

    صدقينى مش الكل كدة

    شكرا


  2. سامي الموضوع بالنسبة ليك مختلف تماماً انت راجل زيك زية

    وفي فرق انك تعامل راجل وانك تعامل بنت

    انا بنقلك الصورة وفعلا مش كل الرجالة بس دي تقريباً صفة غالبه وبجد مش فاهمة ايه سببها

    ممكن اصلا الاقي زميل ليا بيكلمني عن بنت كان بيحبها مثلا وانفصلوا ويأكدلي انها ندمانة عليه وشايف في عنيها الندم ومش قادرة تنساة

    طيب يا عم فتحت معاك كلام يقولي لا
    بتحاول تتصل بيك يقولي لا
    من ساعه مسيبتم بعض سالت عليك يقولي لا

    الله !!!!!
    أومال جايب الثقة دي مين بأمارة إية ؟؟


  3. samy Says:

    انا فاهم قصدك تماما

    لانى لما بدخل اى موضوع مش بس حب

    بحاول احط نفسى مكان الشخص الأخر

    هل من حقة يقول كدة او انا من حقى اقول كدة بلتمس لية الأعذار او بقول هو عندة حق فى كذا وكذا

    يمكن انا مش قادر اوصلك الصورة

    بس كنت كاتب حاجة ممكن تشرح وجهة نظرى


    شكرا


  4. لو تعرفى يابنتى الرجاله دول أغلب من الغلب "على فجله" الذى مثله محمد صبحى باسم (على مظهر) هو المثال الأكثر انطباقا على الغالبيه العظمى الذى يمكن لم تقابليهم فى مشوارك ..نفخة كدابه ولا شىء فى الداخل سوى الهواء.. ذلك ان لم يكن ابوهم من نوع انت عارف انت بتكلم مين ؟؟ يادفعه؟؟ ..هم دول اللى يمكن بتقولى عنهم أما الغالبيه العظمى فهم من فئة جوعتونا جوعتونا والمظاهرات بالفانلات الداخليه !!!